التسئية الشامية ( اسمها عندكم فتة بالحمص )

[ocean7]

التسئية الشامية ( اسمها عندكم فتة بالحمص )

السلام عليكم

هذه الاكلة معروفة للجميع و طعمها جنان و اي واحد يجي لدمشق لازم ياكل منها و في كتير بنات تعلموها مني و طبقوها ببيوتهم و طار عقلهم فيها.

سامحوني لانها بدون صور - هي واضحة ولا تحتاج صور:

نبدأ :
التسئية لها 3 انواع و الاساس فيها هو الحمص المسلوق و المرقة و من ثم الخبز اليابس - لازم يابس لانه اطيب و بتطلع مو مخبوصة - ثم الصلصة الخاصة بكل نوع.

النوع الاول المفضل لدي :
تسئية بزيت :

تضعي في وعاء عميق الخبز اليابس و بتكوني سخنتي الحمص المسلوق مع المرقة و تضعين كمية وافرة فوق الخبز حتى يتشرب و بهالاثناء تكونين حضرتي الصلصة و اسمها عندنا ( فئسة - و بالفصحى فقسة ) و هي : كأس ماء فاتر بالخلاط وملعقة صغيرة كربونة ( هي المادة البيضاء (المسحوق) التي تساعد في نضج الحمص اثناء سلقه ) و 2 فص ثوم مدقوق ( لا تنسوا الخلاط داير ) و بعدين كاس زيت زيتون تصبيه فوق الماء بالتدريج حتى يكتمل و هيك يصير لون الماء مع الزيت متل الحليب تماما - ابيض ابيض و بعدين تصبي السائل كله فوق الخبز المتشرب بالحمص و المرقة .
للتزيين ضعي كمون ناعم و ممكن بقدونس مفروم.

النوع التاني:
تسئية باللبن و الثوم
نفس خطولت النوع الاول من تشريب الخبز بالمرقة و الحمص و الصلصة هي عبارة عن لبن وثوم مدقوق و طحينة و تحطي الصلصة فوق الخبز المتشرب و بعدين تحمي سمنة او زبدة و تحطينها اخر شئ فوق المزيج كله و للتزيين صنوبر مقلي او حبات رمان مفروط او بقدونس مفروم.

النوع الثالث:
تسئية بالبدوة ( البدوة هي حمص مطحون - او اسمها عندنا مسبًحة)
ايضا نفس الطريقة و لكن الصلصة هي كالتالي:
اما تجيبين مسبحة جاهزة من عند بائع الحمص او تعمليها في بيتك ( للبنات يلي في غربة ) و هي :
تضعين حمص مسلوق مع شوية مرقة بالخلاط و اعصري فوقه كمية وافرة من عصير الليمون و طحينة و 2 فص ثوم مدقوق و اضيفي هذه الصلصة للخبز المتشرب بالمرقة و اخر شي تحمين سمنة او زبدة و تحطيها فوق المزيج كله.
اما لما تجيبين مسبحة جاهزة فلازم تعدلين عليها بشوية عصير ليمون و طحينة و توم حتى تصير سائلة قليلا مش جامدة هالأد.
وللتزيين صنوبر مقلي و حبات رمان مفروطة .
أرجو ان تعجبكم و يلي عندها استفسار أنا بالخدمة.

[ღ مــزوحــية ღ]

من كم يوم سويتها
احبها كتير خفيفة علىا المعدة في منهم يحطون معاها لحم
نحن بلبنان نسوي الخلطة الثانية يعني لبن وثوم
والخبز يكون مقلي محمص

مشكوورة اوشين سلمت ايديكي

[mouslima]

سلمت يداك أختي أوشن
أنا بحب التسقية كتير كتير
ونحنا نعملها برمضان كل يوم بس صحن صغير يعني كل واحد ياكل كام لقمة وتخلص هيك التقليد عنا نعملها حد الشوربة والسلطة والطبق الأساسي
ونعمل النوع الثاني فقط باللبن والثوم والطحينة ونحمّص الخبز تحميص ممكن بالميكرو أو الفرن
وان شاء الله نجرب النوع الأول والثالث عن قريب
و الله يعطيك العافية

[المحبه للخير]

يعطيك العافية أوشن

خلاص انا جاية لعندك آكلهم من ايديكي باين عليكي

ماشاء الله شاطرة كثييييييييييييييير

اختك ميمي

[ocean7]

تسلمو حبيباتي مزوحية و مسلمة و محبة الخير

ميمي احنا كمان لازم كل يوم برمضان و كل واحد ياكل كم لقمة
بس ما نحمص الخبز ابدا و انما خبز يابس فقط

[soso baghdad]

والله انا اتعلمت هل الاكله منك وعجبتني جدااااااا و تقريبا كل فترة بعملها لزوجي وحبها كتيرررررررر

الله يعطيك العافيه حبيبتي

[memo queen]

كتييييير كتيييييييييير طلعت طيبة شكراً ألك

[ocean7]

الف صحة على قلبك و قلب زوجك يا سوسو بغداد

ميمو كوين - عنجد جربتيها ؟؟؟؟؟؟؟؟؟؟؟ يا سلام شو انبسطت أنا
اي وحدة عملتي منهم ؟؟؟؟؟؟؟ خبريني و احكي لي
الف صحة على قلبك