شاركوني قصة ولادتي بأول فرحتي....راشد

[اسمك بشرفني حبيبي]

شاركوني قصة ولادتي بأول فرحتي....راشد

كنت بأخر يوم من الاسبوع الأربعين،وكان موعدي مع الدكتورة اللي فحصتني وقالتلي أمورك مستقرة والرحم بعدو مسكر، ماإلك غير إنك تمشي ومعاكي كمان أسبوع تولدي فيه، اذا ما ولدتي بنعطيكي طلق صناعي....

بصراحة روحت من عند الدكتورة وأنا مدايقة، وما عرفت أنام العصر، اتصلت على أمي وقلتلها أنا جايتك المغرب نتمشى شوي...

وفعلا على الساعة 7 المغرب، حسيت بمتل المي نزلت علي (شوي مش كتير)،طبعا محسوبتكم من الخوف صارت تبكي (الموضوع صار جد) وعلى طول اتصلت بزوجي اللي كان بالدوام، وقلتلوا تعال خدني شكلي رح أولد...وخلال 10 دقايق كان عندي، وطول هاي الفترة والمي تنزل علي كميات كبيره وما كان عندي وجع....

بالمستشفى فحصوني وتأكدوا إنها ميه الجنين، بس لانوا ما كان عندي وجع والمية نزلت، عملولي ادخال على الساعة 8.30 وحطوني تحت المراقبة 24 ساعة بحيث إني لازم أولد فيها وإلا بيعطوني طلق صناعي...

بدأ معي الطلق على الساعة 10 وبعديها بدأ يشتد، وصارت الساعة 11.30 والتوسع كان 2 سم بس
بصراحة كان الوجع شديد، والتوسع كان قليل، فخافوا أني استهلك كل طاقتي بالبداية، فأعطوني إبرة مهدئة، بصراحة مفعولها كان سحري، كنت أحس بالوجع بس خفيف..

صارت الساعة 4.15والتوسع 4 سم، وراح مفعول الابرة،وبدأ الوجع الحقيقي، لهون أنا ما اقدرت استحمل الوجع وطلبت ابرة الضهر، بس زوجي (نسيت أخبركم إنو زوجي كان حاضر الولادة من أولها لأخرها) رفض الفكرة، خاف عليّ من المضاعفات، والممرضات حزنوا عليّ شافوني كتير موجوعة، وقعدوا يقنعوا بزوجي بالابرة، وأنا مش حاسة باللي حوليّ. أنا شايفتهم بتناقشوا بس مش فاهمة شو القصة
ووالدتي ماسكة بإيدي تدعي...

على الساعة 4.45بعدين مالقيت إلا الممرضات بدؤوا يجهزوا العدة ونادوا الدكتورة، أنا قلت أكيد خلاص بيعطوني الابرة. إجت ممرضة تانية فحصتني وأنا مش دارية باللي حوالي من قناع الاكسجين المهدئ اللي حاطتوا، وركضت بره الغرفة بسرعة...سألت الممرضة بتعطوني الابرة؟؟ قالتلي: ليش الابرة؟ التوسع صار 7 سم حرام تاخديها، أنتي قربتي تولدي، اتاريهم بجهزوا للولادة مش للابرة

نادوا الدكتورة وكان التوسع كامل، ويلااا ادفعي ادفعي...بس للاسف لما قربت لحظه الولادة راح الطلق، والكل يستنى ويطّلع فيّ
ضلوا يستنوا..بس نبضات الجنين صارت تنزل فأعطوني طلق صناعي
عللى الساعة 5.25صباحا نزل حبيبي رشودي وسمعت بكاءه وكان أحلى صوت سمعتوا بحيااااتي...الله لا يحرمني منوا

وهاي كانت قصة ولادتي...يمكن طولت عليكم... بس حبيت أنكم تشاركوني فرحتي..عسى أيامكم كلها سرور وهنا

[dr bouchra]

حمدا لله على سلامتك لينا وعلى سلامة راشد...يتربى في عزكم ويا رب يجعله من مواليد السعادة...وعقبال كل حامل ويا رب يرزق كل محرومة ويرزقني.

[الفراشه؟]

عن جد بدني قشعر ودموعي نزلت لا شعوريا

من كلماتك الاخيره الله لا يحرمك منه ويخليلك اياه وتشوفيه احلى شب بالدني

رشودي الغالي بس بدنا نشوفه نزلينا صورته والأ بنيجيك ع الامارات

الف الحمد الله على سلامتك حبيبتي وولادتك كانت صعبه شوي بس الحمد الله مضت على خير

الـــــــــــــــــــــــــــــــــــــــــــــــف مبـــــــــــــــــــــــــــــــــــــــــروك حبيبتي لنــــــــــــــــــــــــوش

[❝مرجانة البحار❝]

الله لا يحرمك منه ويخليلك اياه ان شاء اللة

[مريومة 28]

الف الف مبروك
و الله هدا رشود خرجلك عيونك لحتى خرج هههههه
الله يعيشولك و يتربى في عزك و عز ابوه
و يرزق بشرى و الفراشة و اوشن و سارةو بسومة و لملومة و كل محرومة بالدرية الصالحة
الشهر هدا مو بعدو
امين يا رب

[سـمـا]

الف مبروك حبيبتي قشعر بدني انا كمان والله العظيم دموعي نزلت يتربي بعزك وبعز ابوه الف الحمد الله على سلامتك وعقبال عند كل مشتهي يارب

[أجواد]

الحمد لله على سلامتك وسلامة راشد
الله يحفظه وجعله الله قرة عين لوالديه
يالله عقبال ماتجيبي اخت لراشد ههههه

[ساره 2008]

الف مبروووووووووك مرة تانيه

والحمدالله على سلامتك يا ام راشد