لااعرف ماذا افعل

[roza243]

لااعرف ماذا افعل

السلام عليكم ورحمه الله وبركاته
كيفكم بنات حبيت اخذ نصيحتكم لان فعلا الموضوع معقد
القصه بدات من سنه اني وزوجي دائما مشاكل ودائما يهييني ووتصل للضرب لاسباب تافهه يضربني يمكن موقوي لكن مهما يكون ضرب حتى لو ميوجع او ميبقي اثر لكن اني اعتبرة ضرب
المهم استشرت مستشاره نفسيه وساعدتنا تحسن الموضوع لان اني دائما اسكت صرت بدون شخصيه وقلت مشاكلنا لكن زوجي من النوع العصبي جدا ماقدر افتح فمي امامه
وبالصلاه والاستغفار حسيت تغير جدا ويمكن لان اني صرت اسمع ومااعلق او ارد او حتى ادافع على نفسي
المهم البارحه بالليل ردت احجي وياه علمود اعمل تحليل للغدد الصم لانه عندي اعراض مرضها وسمنت ونحول وتعب ودائما احس بالبرد وخدر باصابعي او رجلي كل الاعراض تنطبق عليه
المهم اريد افهمه انطلق انه اني اكعد مثل الخنزيرة اكل وعمري مالعبت تمارين وكاعده بالبيت اكل واكل واني والله صار شهر مااكل شي مسويه رجيم ولاعمري اكلت هوايه حتى اهلي دائما يلحون عليه بس شسوي سمينه ضغط على اعصابي مرددت اسوي مشكله صبرت بعدين كتله بطريقه جافه عوفني روح مناه بس بطريقه جافه هو تخبل بس هذا الكلام كتله بدون صياح بدون انفعال عوفني وروح مناه
واني كنت تعبانه الساعه جانت 12 ونص باليل وكنت هستوني خابزه
مرردت اهينه بس طلعت مني شسوي كاعد يهين ويهين المهم اتخبل شلون تكولين لزوجج روح مناه زوجج اللي الرسول كال لو امرت احد يسجد لاحد ثاني كان الزوجه لزوجها وضربني على حلكي وعلى انفي ودفعني وضل يحجي ويحجي ومنطاني مجال وبعدين رمى عليه يمين الطلاق ثلاث مرات اني كعدت على الفراش اكله انطيني مجال احجي ادافع عن نفسي انت عصبي وطلقتني ميصير هذا الطلاق يكول لا لاعصبي ولاابد مااريدك ولمي غراضك واطلعي من البيت كتله مااطلع وكعدت وسكتت وين اروح ب 1 بالليل حتى سيارات هسه ماكو حجيت وياه كتله هذه حق الجزة اداريك واداري ابنك وهستوني نص الليل خبزت الك لانه انت طلبت يدرون شيجاوب
اني ماعليه بهذا كله عليه انه انت هسه كتلي عوفني وروح مناه شلون هيجي تكليلي
المهم بجيت وهو كاعد يتفرج فلم ولاعبالك صار شي ويضحك
ولامهتم صارت ب3 ونص رحت نمت بفراشي وعفته يتفرج فلم
المهم بعد شويه اجه يكولي روحي نامي على القنفه كتله هذا فراشي مااروح تريد انت روح
ونمت ونام بعد شوي الفجر كعدت من النوم شابكني مكلت شي للصبح ضل شابكني هسه بعده نايم
زين يعتبر اني رجعتله لو لا؟؟؟؟؟؟
شلون اعرف؟؟؟؟
زين شسوي اني ؟؟؟؟؟؟؟
اهلي مااقدر احجيلهم لان اخاف يكبر الموضوع
شسوي ممكن تساعدوني شلون اتصرف الان
تصورون الموضوع يستاهل لو هو رادهه حجه
هسه والله اكتب وابجي لان فعلا ظلمني زين اني مو انسان وعندي مشاعر والله شكد تحملت منه وحتى مرات امه تدافعلي تصورون وهي علاقتها ويايه مو خوش بس من تشوف تصرفاته تدافعلي
البارحه فكرت خل يطلقني ارجع لبيت اهلي معززة مكرمه اشتغل واربي ابني
بعدين استغفرت الله وتذكرت ايامنا الحلوه وياه
شسوي يابنات

[pakiza]

ياعزيزتي روزا واضح من كلامج انك عراقيه
صح؟؟
اهلا وسهلا بيج بنت بلادي
بالنسبه لموضوع الطلاق هذا مااقدر افتي بيه لان حسب القوانين اللي كانت موجوده بالعراق وقبل الاحتلال مافيه كلمة طالق وطالق بالثلاثه
الطلاق يقع فقط امام القاضي والله اعلم
هذا على حسب علمي بالقانون
اما بالشرع فاعتقد لو تسألين بأي موقع للافتاء
لان حتى بذاك الوقت في العراق كان اكو ناس ماتقبل بهذا القانون ويقولون انه هذا قانون مال حكومه مو مال الشريعه الاسلاميه

الله لايكولها ويقع الطلاق بالثلاثه لان بهذه الحاله ماتقدرون ترجعون لبعضكم الا بعد زواجك من شخص اخر ويدخل
يعني مو فقط عقد قران على الورقه

الله يسعدك ويهدي زوجك
امين يارب

تحياتييييييييييييييي

[roza243]

جزاك الله خيرا
زين اكو مواقع افتاء بالنت الان
لو اروح للجامع واسال

[pakiza]

اي عزيزتي روزا اكو مواقع افتاء ابحثي عنها في قوقل
وايضا تقدرين تروحين للجامع وتسألين شيخ يكون فاهم ومعروف
يعني مو تسألين كلمن هب ودب
لان الموضوع حساس حبيبتي

تحياتيييييييييييييييييييييي

[بقايا امرأة]

الله يفررج همك
الاحسن تسالين شيخ

[حلم الجنوب]

معليش انا مافهمت كثير من كلامك بس اللي فهمته انه طلقك ثلاث طلقات وهو معصب
طبعا ما نقدر نفتيك في الطلاق بس روحي لشيخ يكون مفتي عام وهو بقول لك

بس ياليت ما يكون من العراق او ايران لانهم للاسف الشرع عندهم يختلف باختلاف المذاهب والاديان
والله يصلح زوجك

[roza243]

جزاكم الله خيرا كل البنات اللي ردوا عليه والاخت بكيزه
والله القلب يدعيلك في الصلاه
رجعني زوجي
الطلاق هذا يعتبر مره وحده سالنا
وضعنا حاليا بارد جدا
احس والله انه صرت مااحبه بعد هذا الموقف
وكانه يوم بعد يوم ابتعد عنه
هو محاس بهذا الشي
لانه ملتهي بالشغل واني احاول مااحسسه
لكن احس والله انه مااحبه بعد كانه صار عندي رد فعل معاكس او كابه او تحسس داخلي
لانه مكان الي ذنب بالطلاق ونظلمت جدا بهالموقف