أنظمة وقوانين التسجيل المجموعة الاجتماعية  معرض الصور  ابتسامات شروح خاصة
العودة   منتديات سيدتي النسائي > حياتك سيدتي > طفلك سيدتي > الاطفال



نصائح قيمة لكل أم .... فن تربية الاولاد


جديد مواضيع الاطفال


إضافة رد

  • Facebook

  • Twitter


Sponsored Links
قديم 03-08-2012, 06:16 PM   رقم المشاركة : 1
:: سيدة مميـزه ::











icon75 نصائح قيمة لكل أم .... فن تربية الاولاد

نصائح قيمة لكل أم .... فن تربية الاولاد





السلام عليكم ورحمة الله وبركاته

كيف حالكم اخواتي الامهات

طبعا كلنا بتعب جدا فى البيت ومع الاولاد
و للاسف عصبيتنا هي المسؤلية عن سوء تربية الاولاد

اختي من الان اتخدي القرار انك سوف تربي اولاد بأفضل الطرق
وانا بأذن الله اعلمك الطريقة
ولكن الموضوع محتاج كثير من الصبر

بسم الله نبدأ


اولا: تشكيل معتقد الطفل عن ذاته

لازم نفهم ان الطفل بيبنى فكرتة عن نفسة من خلال اسرتة و بالذاااااات الام
يعنى زى ما هتقولى عليه زى ما هياخد فكرة عن نفسة و يتصرف من خلالها باقى عمرة كله

انتى بقى عليكى فكرتة عن ذاتة تبقى ايجابية ولا سلبية ؟؟

انتقاد= سلبية = شخص مهزوز فاقد الثقة فى نفسة و على هامش المجتمع
مدح = ايجابية = شخص ثابت وجودة واثق فى نفسة و مبدع و يجبر الاخرين على احترامة

طيب هتكلم شوية عن النقد اللى احنا شغالين فيه دة

احنا بننتقد علشان فاكرين اننا لما نعمل كدة هيحسن و بنشجعة انه يتغير و دة غلط كبير

مثال :: لما جوزك بينتقدك عمرك بتتحسنى و لا بتكتئبى و يجيلك احباط ؟؟
لما جوزك يمدحك مش بتتشجعى و تحسى بثقة و دفعة للامام؟؟

و هكذا فى كل الامور و كل الاشخاص
مفيش حد بيتقبل النقد و لا بيتحسن منه بل بالعكس دايما النتيجة عكسية خالص
و دايما الواحد يتقبل المدح و يحاول يبقى على مستوى حسن الظن دة و اعلى كمان ....صح


تعالى نشوف ايه الرسالة اللى وصلت لابنك من النقد :
الرسالة هى انت عيوبك كذا و كذا و كذا
طيب بالله عليكى دة كلام ينفع من ام مربية لشخصية سوية
انتى بترشدية لعيوبة بدل ما ترشدية لمميزاتة

هاقولك على حاجة غريبة ....فى موقفين وحيدين بنشجع فيهم دايما و عمرنا ما بننتقد و هما المشى و الكلام
تلاقيكى عماله تشجعى فية مهما وقع و برضة تفرحى بكلامة مهما كان مكسر و مش باين
عارفة ليه .........لانك واثقة انه كدة كدة هيمشى و هيتكلم و انها مساله وقت
طيب ليه ميكونش عندك نفس القناعة فى الامور الايجابية اللى طفلك او حتى السلبية !!

انتقادك لطفلك هيؤدى الى هذه الامور:
1-هيعمل مسافة بينك و بينه و ينفر منك لانك بتفكرية بعيوبه و فشله .
2-هيعند زيادة و يتمسك بالسلوك السئ و ينتقل للاسوأ.
3-هيعمل معاكى نفس الحكاية لما يقدر و يكبر شوية .

اذا ماهو الحل ؟؟

تابعوووووووووونى ان شاء الله تجدوا ما يسركم

يتبع بأذن الله
لـ حفظ الموضوع والإستفاده منه إستخدمى هذا الرابط :
نصائح قيمة لكل أم .... فن تربية الاولاد
http://forum.sedty.com/t565219.html




رد مع اقتباس

Sponsored Links




قديم 03-08-2012, 06:18 PM   رقم المشاركة : 2
:: سيدة مميـزه ::











افتراضي رد: نصائح قيمة لكل أم .... فن تربية الاولاد


ثانيا

عدم الوعى بالاسباب الحقيقية لخطأ الطفل


لما الطفل يغلط و قبل ما نعاقب او نتعصب لازم الاول نسأل نفسنا هو ليه غلط الغلط دة ؟



لو عرفنا السبب يبقى هنعرف نحل المشكلة من غير ما نتسبب فى سلبيات فى شخصية الطفل من الاساليب التربوية الغلط زى الضرب و الزعيق لانهم فى الاصل مش حل و انما مجرد تنفيس لغضبنا احنا .


من الاسباب اللى ممكن تخلى الطفل يغلط :

1- عدم قدرة الطفل على ضبط نفسة او اصلاح سلوكة
و دة طبيعى فى الاطفال لان سنهم صغير اوى على انهم يصلحو او يعدلو من سلوكهم


يعنى مثلا ممكن طفل عمال يعيط و انتى مدايقة من صوتة و تقعدى تزعقى اسكت اسكت و هو ميسكتش ....و تقولى دة عنيد ...لكن الحقيقة انة مش عارف يسيطر على نفسة لان سنة اصغر من انه يقدر يتحكم فى نفسة و يظبط انفعلاتة .


مثال تانى ..فى سن السنتين مثلا بيبقى طبيعى جدا فى الطفل الانانية و يحبو ياخدو و ميدوش ....تيجى انتى تطالبيه انه يدى حاجة او يعمل عمل معين ...هو ممكن يرفض ...مش علشان هو وحش لا علشان دة ضد طبيعتة فى المرحلة العمرية دى .


2- الجهل و عدم الفهم الصحيح للامور


خدى بالك انة معندوش وعى زى وعى سيادتك !!
لازم انتى اللى تنزلى لمستوى تفكيره مش تطلبى منه ان هو اللى يطلع



3- حب الاستطلاع

و دة طبيعى فى السن دة و لازم نشجعه مش نحبطه
مثال شااااائع ::الطفل اللى يطلق عليه الطفل المخرب
تلاقى ابنك عمال يقلب فى البيت و يفكك فى اللعب بتاعته و انتى بقى تزعقى " انت على طول كدة تكسر اللعب و تبهدل الدنيا ....مش هاجبلك لعب تانى "


هنا الغلط مش منه دة منك انتى
يعنى هو طبيعى انه يحاول يكتشف و انتى عليكى تنمى الحكاية دى او تقتليها
و لما تقتليها مترجعيش تزعلى و تقولى هو ليه معندوش ابداع!!


لو فتح لعبة علشان يكتشفها شاركيه اكتشافة و افرحى بيه بدل ما تحبطيه .


و هنا لازم تفرقى بين انة بيكتشف او انة بيتعمد التخريب فعلا او بهدلة الدنيا ...ليه بقى ؟؟
لان الحالة الاولى علامة صحية .....اما التانية علامة مرضية تدل انك غلطانة فى التعامل معاه و لازم علاج .


4- لفت الانتباه

دى مهمة اوى ....ممكن يكون هو مش حاسس باهتمامك بيه و نفسة تهتمى بيه فيعمل قلق بس علشان يقولك انا اهو ...


5- الفراغ عند الطفل

و دة بيعمل له ملل و الملل يخلى تصرفاتة مش مظبوطة و متلوميهوش على كدة ....لا نلوم نفسنا لاننا احنا اللى لازم نشغل وقتة بحاجة مفيدة .


6- حب اعتماد الطفل على نفسة .

و هنا طبعا لااااااازم يغلط و لازم انتى تسيبية يغلط و يتعلم من الغلط الصح ....لازم نسمح للطفل بالتجربة و نسيب له مساحة من الغلط على يكبر الطفل دة على الثقة بالنفس و التقدير للذات .


7- شعور الطفل بانه مفتقد شيئا ما ....و دة ممكن يكون :الاكل الجيد
الحب فى الاسرة
الامان
التقدير
تحقيق ذاتة و تجربة الامور بنفسه
يبقى احنا دلوقتى علينا اننا قبل ما نعاقب على السلوك السئ و الغلط لازم نعرف الدوااااااااااااااافع الحقيقية ورا السلوك دة علشان يبقى العقاب تاديب و ليس تعذيب .


يتبع بأذن الله


قديم 03-08-2012, 06:21 PM   رقم المشاركة : 3
:: سيدة مميـزه ::











افتراضي رد: نصائح قيمة لكل أم .... فن تربية الاولاد


ثالثا

الصبر فى التعامل مع اخطاء الاطفال و تعديل سلوكهم



دى مشكلة كبيرة

الام او الاب عايزين اول ما يقولوا الكلمة تتسمع و لو الطفل كرر الغلط يبقى عنيد و قاصد و مستفز و يستاهل اللى يحصل له !!!


المشكلة هنا فينا احنا و مش فى الطفل

الطبيعى ان الطفل يحتاج للتكرار و ان يعى الاباء المستوى السنى و الذهنى للطفل و هما اللى ينزلوا له
لكن للاسف تلاقى الاهل هما اللى عايزين الولد يطلع لمستواهم الفكرى و يبقى فذ و عبقرى و من اول مرة يسمع الكلام و ميكررش الغلط تانى ابداا!!


دة قصور فى الفهم عندنا و لازم نصلحه


علميا :علشان يتغير سلوك الطفل بيحتاج من شهر ونص لشهرين .


من اسباب عدم الصبر عند الوالدين:

1- اختلاف المعايير فى عالم الطفولة عن عالم الكبار .

يعنى احنا كبار عارفين مصلحتنا اللى اتعلمناها فى سنين طويلة ....اما الطفل فالعكس تماما لا سنه و خبرتة لا تسمح له بالتصرف الصحيح .


2- عدم ادراك الوالدين ان طبيعى ان الطفل يخطئ.

اصلا لو الطفل مغلطش يبقى عنده مشكله و مش طبيعى مش العكس !
احنا بقى دورنا نعلمه من غلطه دة مش نعنفه عليه


3-عدم ادراك الوالدين ان مشكلات الطفل تحتاج لوقت طويل علشان تتحل .

يبقى لااابد من التعامل مع الطفل بسياسة النفس الطويل لان غير كدة يبقى هنعمل مشكلة نفسية عند الطفل و كمان الام اعصابها هتتعب و تحس بالفشل الدائم .


يقول الله تعالى "والكاظمين الغيظ و العافين عن الناس و الله يحب المحسنين "

طيب من اولى بكظم غيظنا و عفونا من ولادنا حبايبنا ؟؟؟؟


افتكرى ان "كذلك كنتم من قبل فمن الله عليكم "....ففيوم من الايام كنتى ضعيفة زييه كدة و كنتى بتغلطى بردة ...عامليه زى كنتى تحبى اهلك يعاملوكى ساعتها.


افتكرى انه هو دلوقتى الاضعف و انتى الاقوى و محتاااااااج مناهدة و تعب علشان تتعاملى معاه صح ......فى يوم من الايام هتبقى انتى الاضعف و هو الاقوى و بردة هتبقى محتاجة مناهدة و تعب علشان يتعامل معاكى صح ....فعامليه فى ضعفه زى تحبى يعاملك فى ضعفك .

يتبع بأذن الله

قديم 03-08-2012, 06:23 PM   رقم المشاركة : 4
:: سيدة مميـزه ::











افتراضي رد: نصائح قيمة لكل أم .... فن تربية الاولاد


رابعا


فرض الاوامر على الطفل


دة غلط كبير كدة مننا و اساسة هو حب السيطرة و الديكتاتورية .....فكرة انهم صغيرين و احنا الكبار و لااااااااازم يسمعوا كلامنا دى فكرة غلط و بتطلع شخصيات منقادة مالهاش اى شخصية .
و للاسف الوالدين مش مدركين ان الطفل عندة القدرة على الاختيار و الاعتماد على نفسة فى امور كتير




تلاقى الام طول اليوم " كل ....نام ...اقعد ....انا مش قلت لك اعمل كدة ....."
نتيجة هذا الكلام حاجة من اتين :

1- يبقى شخصية ضعيفة بيسمع كلام اى حد و يخاف يعبر عن راية
2- يكبر دماغة منك على الاخر و يسيبك تقولى و يعمل نفسة مش سامع


و فى الحالتين نتائج مش كويسة

بس فى حالات لاازم يبقى فيها فرض الاوامر على الطفل و علشان الحالات دى نحاول فى باقى الاحوال اللى لا تستدعى نخلى الامر بالاقناع علشان فرض الاوامر ميفقدش مفعوله


الاحوال التى يجب فيها فرض الاوامر :

1-النوم
2- لو اتعرضت صخة الطفل للخطر
3-لو فى روتين معين بتمشى عليه الاسرة


يبقى لازم يكون للطفل مساحة من الحرية يختار فيها و يحس بنفسة .
يعنى ياكل بطريقتة و يلعب بطريقتة حتى لو طريقتة ادت لبعض الحوادث البسيطة للبيت و تعبتى لتضيفها بس معلش ما هو لازم يتعلم و مع الوقت هيعمل الصح .


طيب لو الطفل عاندك فى امر زى لبسة مثلا او كدة ....متزعليش و تقولى دة وحش و عنيد
لا بصى للامر بوحهة نظرة هو ...انه عايز يحس بشخصيتة و انه هو اللى بيختار
دى شئ ايجابى مش سلبى
متدمريهوش انتى بقى بكلام مدمر ...انت عنيد ...انت مبتسمعش الكلام ...و كلام من دة
لا لو الامر بسيط و مفيهوش خطر عليه عديه و شجعيه و افرحى باختيارة و حسسية انه احلى اختيار فى الدنيا


حتى لو اصر مثلا ينزل بشراب شكل و شراب شكل .....اه و الله ....سيبية و قولى له انها فكرة رووعة


او ممكن انتى تديلة اختيارات يختار ما بينها ...كدة انتى فى حقيقة الامر انتى اللى مختارة بس هو فاكر ان هو اللى بيختار ....فاهمننى .

الخلاصة

1- نسيب الاولاد يلعبو بطرريقتهم الخاصة و منفرضش عليهم طريقة معينة للعب .
2- اتركى حرية الاختيار للطفل انه يختار وقت اكله و ياكل بنفسة لو عايز حتى لو وقع على الارض و انتى عليكى تنضفى
3-بردة فى اللبس سيبية يحاول يلبس بنفسة الحاجات السهلة .
4-لما تختارى له انتى حاجة مينفعش هو يختار فيها بنفسة حاولى تفهمية سبب اختيارك ليها ايه مش فرضها عليه بالقوة و خلاص يعنى حاولى تقنعية بيها و تحسسية ان هو اللى عايزاها .


يتبع بأذن الله

قديم 03-08-2012, 06:27 PM   رقم المشاركة : 5
:: سيدة مميـزه ::











افتراضي رد: نصائح قيمة لكل أم .... فن تربية الاولاد


خامسا


فرض الانضباط على الطفل



عادة فى الطفل الاول بيبقى عندنا تساهل جامد اوى مع الطفل بحجة انه لسة نونو و يعمل اللى هو عايزة و انه مش فاهم و اول ما يعيط على طول نعمل اللى هو عايزة
و بكدة تلاقى الطفل يستمر على غلطة طول عمرة


و النوع دة هو اللى بيربى اهلة مش اهلة اللى بيربوه و هما اللى السبب فى كده فمايلموش غير نفسهم لما يكبر و ميقدروش عليه.


تلاقى دايما الطفل ده عامل مشاكل فى المدرسة او الحضانة لانه عايز يضرب و ميتضربش و يعمل و ميتعملش فيه زى ما بابا و ماما بيعاملوه فى البيت
ساعات كمان بيبقى فى طفل عيان مثلا فوالديه يبتدو يسيبوه يعمل اللى هو عايزه

بس الاسلوب دة للاسف ضد مصلحة الطفل مش لصالحة
لازم نوازن الامور لا افراط و لا تفريط
لازم يبقى فى جزم فى امور معينة لكن ميبقاش فى قسوة


لازم نفهم ان الطفل زى القطار محتاج قضبان تخليه يمشى فى المسار الصحيح و القضبان دى هى الام و الاب .و الانضباط مش معانه القسوة و لكن هو انضباط مكسو بالحب و الحنان لاننا هدفنا تعديل سلوكة علشان يبقى انسان متزن مش معقد نفسيا



الانضباط هو الاسلوب الحازم بهدؤ و بنظرة حازمة وبدون صراخ او ضرب او قسوة


مثال نبوى لتعديل السلوك ::

لما كان فى طفل بياكل امام النبى صلى الله عليه و سلم قال له النبى " يا غلام سم الله و كل بيمينك و كل مما يليك "شايفين ازاى التوجيه هادى و باين فيه اوى احترامة للطفل رغم حزمه


مشكلة معروفة ::

الطفل اللى يخبط راسة فى الارض علشان ياخد اللى هو عايزة فنخاف عليه و نديله دة غلط
ليه بقى ؟
لان الحالتين اللى فيهم ممكن فعلا يخبط راسة هما

1- عندة تخلف عقلى
2- عندة فرط حركة

الطفل العادى بيبقى بيهدد بس و لو خبط مرة ووجعتة مش هيخبطها تانى و هيعرف ان مش دة الاسلوب اللى يضغط بيه عليكى .

سادسا


بشاشة الاب و الام فى المنزل



للاسف امهات كتير و ابهات بردة فاكرين انهم لازم و حتما و لابد يكونوا مكشيرين علشان يبقوا حازمين و ان دى تربية صحيحة و علشان الطفل ميطلعش دلوع
لدرجة ان فى امهات مبتقدرش تحضن ولادها !!


طيب كدة ازاى الطفل هيعرف التصرف الصحيح من الخاطئ ؟؟؟
الانجاز من عدمة ؟؟؟


لما التعبيرات كلها واحد عند حضرتك .....يفهم هو ازاى انه نجح فى الشئ الفلانى ؟؟


ثم الحالة النفسية للام تنتقل بالتبعية للابناء
فالام الكئيبة تلاقى العيال كئيبة و تسد النفس
الام الفرفوشة تلاقى العيال زى السكر و يفتحوا النفس


انا عارفة ان مسؤلياتنا لكن نحن نريدان نساعد بعض علشان نطرد الكابة دى من حياة ولادنا


مثلا لازم اول ما يصحوا نضحك فى وشهم علشان توصل الرسالة اننا فرحاااااانين بيهم و انهم صحيوا دة مهم لنفسيتهم علشان احساسهم بنفسهم و ثقتهم
تخيلى معايا كدة

1- طفل صحى الصبح مامتة على طول .......توووووووووووتى انت صحيت يا كميلة ...صباح الخير يا سكر ...وحشت مامى ..و حضن و بوسة
تخيلى كدة الطفل دة نفسيتة تبقى عاملة ازاى طول اليوم ؟؟؟
طيب الرسالة اللى وصلتلو اية ؟؟...........مش انة مهم و انك بتحبية و فرحانة بية ؟؟؟


2- طفل صحى من النوم لا بيه و لا علية ..........انت صحيت .......يلا اغسل وشك و تعالى افطر علشان تروح المدرسة ....يلا بسررررررعة انت بتتلكع كدة لية ...........و ياخدلة زقة على الماشى
دة نفسيتة تبقى عاملة ازاى ؟؟
طيب الرسالة اللى وصلت اية ؟؟..............انة غير مهم بالمرة و انة مجرد حد عادى بالعكس كمان دة يحس انة تقيل على الام دى


يبقى نطبق الحكاية دى فى كل الامور و الظروف قدر الاستطاعة ...يعنى مثلا و هو راجع من المدرسة ..........و هو نازل المدرسة ..........و هو رايح جاى فى الشقة برضة لما تشوفية اديلة بوسة و ضحكة و كلمة حلوة

مش لازم يبقى فى عيد و لا مناسبة سعيدة يعنى


يبقى احنا عايزين نخلى وشنا مفرود طول اليوم فى وش الولاد علشان يطلعوا اسوياء نفسيا و مرتاحين ......حتى لو تعبانين معلش خلى البوز الناحية التانية و لما تبصى ليهم فى وشهم خلى الابتسامة هى السائدة ..............و لما يعملوا حاجة حلوة هااااااااااتك يا تشجيع ................لو حاجة وحشة يسمح بالنظرة الحااااازمة و لكن بدون وجة مرعب للطفل .



يتبع بأذن الله

قديم 03-08-2012, 06:30 PM   رقم المشاركة : 6
:: سيدة مميـزه ::











افتراضي رد: نصائح قيمة لكل أم .... فن تربية الاولاد


سابعا واخيرا


الاهانة و التحقير للطفل


كتير جدا بشوف امهات بيكلموا ولادهم كانهم حشرات مثلا
دة غير الوصف باسامى الحيوانات زى يا حمار او يا كلب و خلافه
و متتخيلووووووووش كمية السلبيات فى الشخصية من الاسلوب دة



مش فاهمة يعنى هو انتى متخيلة انك لما تقوليله يا حمار هيبقى احسن و انك كدة عالجتى المشكلة !!
و لا هيطلع انسان مهزئ وواخد على الاهانة ببساااااااااطة لان الشخص اللى هو بيكون فكرتة عن نفسة منه بيقول علية حمار يبقى هو هياخد فكرة عن نفسة انه فعلا حمار و هتلاقيه فاقد الثقة فى نفسة و فى ارائة و خايف ياخد اى خطوة او يبدع اى ابداع .


الحكاية دى بنشوفها كتير اوى فى المزاكرة و اهى المدارس قربت و علشان كدة حبيت اقولها دلوقتى .
تلاقيكى قاعدة جنب الضحية قصدى الطفل و عماااااااله تشخطى و تنطرى " يا غبى انا مش قولتهالك 100 مرة ....انت مبتفهمش ....دة العيل ابو سنتين يفهمها ....انت قرفتنى ....انت مفيش فايدة فيك ..."


تفتكرى ان الطفل دة عمرة هيبقى شاطر او يحب الدراسة و لا هيتعقد منها و يكره نفسة و يحس انه فاشل و غبى !!


انتى مش حاسة انتى بتعملى فيه اية ؟؟

انتى بتدمرية تمامااااااااااااا .....دة هيفقد كل ثقتة فى نفسة و يبقى انسان عاجز عن النجاح و الابداع و انتى السبب ........عدم صبرك و عصبيتك السبب


و على فكرة اغلب الصعوبات فى التعلم للطفل و عدم التحصيل مش من قله الذكاء .....لا دة من الطريقة الغير صحيحة فى التعليم و الاسلوب التحقيرى دة للطفل


يبقى لااااازم تفهمى ان كلامك لطفلك دة بيفضل راسخ فى دماغة للابد و بيكون منه فكرتة عن نفسة
و مش الكلام بس
النظرات بردة اللى من تحت لتحت خدى بالك منها
بلاش النظرات اللى الطفل يحس فيها بانة و لا حاجة دى حرام عليكى


لاازم تحترمى طفلك علشان يبقى انسان محترم و الناس تحترمة

لو الناس شافوكى بتهزئيه حيهزئوه برضة اكيد .


و اياااااااااااااااااااكى و الاهانة ادام الناس ايااااااااااااااكى اياااااااااااااااكى لانها اسرع طريقة لتدمير طفلك لانها


1- هو بيتاثر بيها جدا لانك بتحرجية و تكسرية ادام الناس
2- الناس نفسهم بيستهينوا بالطفل اللى امه تستهين بية و يحترموا الطفل اللى امة تحترمة


شوفى انتى لو جوزك زعقلك ادام الناس بتحسى باية ؟؟؟؟
الخلاصة
ابنك هيقدر نفسة فقط لما تقدريه انتى و مش هيحترم نفسة الا لما تحترمية انتى الاول


و اختم بقول الرسول صلى الله علية و سلم "المسلم من سلم المسلمون من لسانة و يدة " يبقى مين اولى الناس انك تسلمية من لسانك و يدك .....مش ابنك برضة ؟؟


اتمني ان لا اكون اطلت عليكم

قديم 03-08-2012, 07:11 PM   رقم المشاركة : 7
:: VIP ::











شكر وتقدير وسام شيف سيدتي 
افتراضي رد: نصائح قيمة لكل أم .... فن تربية الاولاد


ما شاء الله تبارك الله
موضوع قيم
بارك الله فيك

قديم 03-08-2012, 08:35 PM   رقم المشاركة : 8
عضٌوة شٌرٍفـَ منتديـُآت سَيدتـيّ











وسام العطاء لمنتديات سيدتي 
افتراضي رد: نصائح قيمة لكل أم .... فن تربية الاولاد


بارك الله فيك اخيتي على مجهودك الرائع

بلهفة جديدك القادم بشوق

ودمتي بود

‘‘شــــكــــولاه‘‘



برنامج تكسير الدهون وازالة السيلوليت بدون عمليات 6 جلسة 1000 ريال 0112499111_0554171121 اتصلى بنا
تفتيح البشره وازالة التصبغات بياض حتى 4 درجات ازالة الكلف في جلسة واحده. يصلك اينما كنت 0112499111/0554171121

إضافة رد




نصائح قيمة لكل أم .... فن تربية الاولاد

أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

منتديات سيدتي - موقع سيدتى - سيدتي النسائي

المواضيع المتشابهه
الموضوع كاتب الموضوع المنتدى مشاركات آخر مشاركة
أخطاء فادحة في تربية الاولاد othkrallah المواضيع المكررة 2 10-14-2011 08:47 PM
اختلاف تربية الاولاد عن البنااااااات زوجه ثانيه صحة الطفل 3 10-24-2009 08:55 AM
الاسباب المعينه على تربية الاولاد.... قاهره الاحزان الاطفال 3 03-27-2009 12:45 AM
مظاهر التقصير والخطأ في تربية الاولاد نجمة المستقبل الاطفال 4 04-20-2008 11:31 PM
تربية الاولاد على الصلاه اجرااس الرحييل الاطفال 1 01-29-2008 06:13 PM






Powered by vBulletin® Version 3.8.7, Copyright ©2000 - 2014, Jelsoft Enterprises Ltd.
SEO by vBSEO
منتدى سيدتي النسائي منتدى مستقل وليس له علاقه بأي جهة أخرى
المشاركات والتعليقات المنشورة بأسماء أصحابها أو بأسماء مستعارة
لا تمثل الرأي الرسمي لـ منتدى سيدتي النسائي بل تمثل وجهة نظر كاتبها.

Privacy Policy

Facebook Twitter Twitter