أنظمة وقوانين التسجيل المجموعة الاجتماعية  معرض الصور  ابتسامات شروح خاصة
العودة   منتديات سيدتي النسائي > منتدى سيدتي الادبي > قصص و روايات > الروايات


رواية حبيته وجرحني تحملته وزاد في تجريحي كامله رومنسيه


جديد مواضيع الروايات


إضافة رد

  • Facebook

  • Twitter

Sponsored Links
قديم 07-16-2012, 02:43 AM   رقم المشاركة : 1
:: سيدة رائعــة ::








افتراضي رواية حبيته وجرحني تحملته وزاد في تجريحي كامله رومنسيه

رواية حبيته وجرحني تحملته وزاد في تجريحي كامله رومنسيه

رواية حبيته وجرحني تحملته وزاد في تجريحي كامله رومنسيه

صبـــاح#مســـــآاآء الخير عالجميع
أخباركم إن شاءالله بخيــــر
هذي روايه قريتها مررره حلووووه وحبيت إني أنقلها
أتركم مع الروايه وأتمنى تعجبكم ....


لحفظ الحقوق/

بقلم:الفجــ البعيد ــر

((بعدني عنه وترك جروحي تنزف))


الجزء الاول


ابو زياد بعصبيه: انت ماتفكر الا في نفسك
زياد بقهر:يبه هذي حياتي وانا حر فيها
ابو زياد بحزم :شوف اذا ماتتزوج لا انت ولدي ولا اعرفك
قال ابو زياد كلمته وطلع وترك زياد بين خيارين كل واحد اصعب من الثاني
جلس زياد على ركبه في لارض وقال بمراره :ذبحتني يابوي ذبحتني
دخلت ام زياد وجلست جنب زياد على لارض وحطة يدها على كتفه وقالت بحنان:ياوليدي ابوك يبي مصلحتك وده يشوف عيالك قبل موته لا تحرمه امونيته وانت تقدر
زياد رفع راسه وطالع في عيون امه شاف فيها ترجي في تلبية طلب ابوه
قام وحب راسها وطلع من غير ولا كلمه
زياد شاب وسيم عيونه وساع ورموشه كثيفه وخشمه طويل كأنه مرسوم رسم وفمه وسط وحواجبه مرسومه رسم كثيه شوي شنبه اسود بس من النوع الي يحبه خفيف شوي ويحط دقن الي ماهي عوارض بس مدري وش اسمها وجسمه رياضي طويل وشعره ناعم طويل شوي وهو يميل للبياض شوي ماسك شركة عمه وابوه وهو يد ابوه اليمين وراضع مع عمه خالد الي توفى وهو صغير متزوج بنت خالته اميره عن حب وله هيبه وحضور والشين في زياد انه عصبي مره عمره 29سنه
هنادي اخت زياد عمرها 22 سنه تشبه زياد كثير شعرها طويل وجسمها متناسق
هنادي نازله مع الدرج صادفة زياد
هنادي ببتسامه :هلا بالغالي
زياد طالع فيها وتجاوزها وطلع من غير ولا كلمه
هنادي استغربت ردة فعل زياد هنادي في نفسها "اكيد ابوي مكلمه في الزواج مره ثانيه"
دخل زياد الجناح الخاص فيه ولقى اميره جالسه تتفرج على التلفزيون واول ماشافته قامة له وهي مبتسمه
اميره جسمها حلو عمرها 23 سنه شعرها اسود ماهو طويل مره لانها تحب تقصه عيونها كأنها مكحله بس ماهي وساع مره فمها صغير وبيضا وخشمها حلو
+++
اميره ببتسامه:هلا حبيبي
زياد ببتسامه باهته:هلافيك
اميره بخوف:زياد فيك شي
زياد تجاوزها وجلس على الكنبه وحط راسه بين كفوفه
اميره جلست جنبه وقالت بحب:حياتي وش فيك
زياد رفع راسه وقالها :ابي انام
اميره اعرفت من رد زياد انه مايبي يتكلم في أي شي
قام زياد ودخل الغرفه وأخذ منوم يبي ينسى كل شي مر عليه اليوم
اميره نزلت تحت تبي تشوف وش صاير
هنادي كانت في الصاله تبكي على حال اخوها من بعد امها ماقالت لها السالفه وهي تبكي
اميره بخوف:هنادي وش فيك وش صاير
هنادي رفعة راسها وشافة اميره واقفها عندها فزاد بكيها
اميره ضمتها وقالت :حبيبتي وش فيك
هنادي قالت السالفه لاميره كلها تبي تريح اخوها من مواجهة اميره
اميره ودموعها على خدها :انتي وش تقولين
هنادي :اميره ماعليك انت عارفه ان زياد يحبك انتي ولا يبي غيرك وان تزوج تزوج عشان العيال
اميره بصوت عالي:وشلون ماعلي تقولين زياد بيتزوج تعرفين يعني شنو يتزوج يعني يوم موتي
ام زياد داخله:بسمله عليك يمه
اميره ركضت لخالتها وضمتها وجلست تبي في صدرها
ام زياد بحنان:اميره الحرمه ماتضر الحرمه اذا عدل الرجال وانتي عارفه زياد وش كثر يحبك
اميره بصوت مبحوح من كثر البكي :ليتني اموت قبل يوم زواجه
ام زياد:انشاء الله الي يكرهونك
اميره حررت نفسها من صدر خالتها وطلعت وهي كلها الم وجروح
ام زياد لهنادي:ليه تقولين لها
لـ حفظ الموضوع والإستفاده منه إستخدمى هذا الرابط :
رواية حبيته وجرحني تحملته وزاد في تجريحي كامله رومنسيه
http://forum.sedty.com/t625187.html


رد مع اقتباس

Sponsored Links



قديم 07-16-2012, 02:44 AM   رقم المشاركة : 2
:: سيدة رائعــة ::








افتراضي رد: رواية حبيته وجرحني تحملته وزاد في تجريحي كامله رومنسيه


هنادي بألم:ابي اريح زياد من مواجهتها لاني اعرف ان زياد مايقدر يقولها
ام زياد :الله يعينك يازياد



+++


في حي ثاني من احياء الرياض البسيطه
ريم بدلع:مابي يعني مابي
ام طلال:ريم خلي عنك الدلع وروحي قولي لعمك يجيب لاغراض
ريم تحب خد امها :تامرين ياقلبي
ام طلال:الله يوفقك ويرزقك ببن الحلال الي يسعدك
ريم راحت لعمها الي كان في المجلس يقرا الجريده
ريم:السلام عليكم
ابوبدر:وعليكم السلام
ريم بتردد:عمي نبي اغراض للمطبخ
ابو بدر بهدو:انشاء الله
ريم طلعت من عند عمها وهي تفكر في حالهم من يوم توفى ابوها وعمها شايل الحمل كله وهو ماديته ضعيفه حيل صح انه يسكر بس مع ذالك قام بطلباتهم
ريم بنت حبوبه عمرها 18 سنه في ثالث ثانوي جسمها روعه وشعرها طويل لنصف ظهرها قطعه وحده وكثيف وهي بيضاء مره وخدودها مورده فمها وسط مليان عيونها وساع فيها حده شوي ورموشها كثيفه كأنها مركبه رموش وخشمها حلو متناسق مع وجها حواجبها مرسومه رسم وهيئتها فيها غرور وعتزاز بالنفس مشيتها تدل على انوثتها ودلعها
ام بدر:ريم نادي امك تجي تتقهوى معي
ريم ببتسامه :حاضر عمتي



+++


قام زياد وشاف الوقت متأخر وشاف جواله كان فيه اكثر من مكالمه من عمه محمد ولد عمه فهد
طلع لصاله شاف اميره ماسكها راسها وشكلها يدل على الحزن
زياد جلس جنبها وقال بحنان:اميرتي وش فيك
اميره طلعها من تفكيرها صوت زياد فرفعة راسها له وحطت عيونها في عيونه وقالت بحزن:بتتزوج
زياد كأن احد كب عليه مويه بارده :من قالك
اميره ودموعها على خدها:بتتزوج
زياد ضمها لصدره وقال بألم:قولي لي وش اسوي وانا بسويه
اميره تتمسك فيه بشده كأنه بيطير منها
زياد جلس يمسح على شعرها وهو يتمنى ان كل هذا حلم مزعج ويصحى منه
+++
فهد يكلم بجواله اخته دانه بالجوال
فهد:تامرين يالغاليه
دانه:مايامر عليك عدو
فهد:خلاص امرك بكره اوك
دانه:خلاص استناك
سكر فهد من اخته دانه ودخل بيتهم بيشوف وش صار مع ابوه قدر يقنع عمه او لا
فهد شاب عمره 28 سنه وسيم حيل تحس انه الجمال العربي لاصيل يميل لسمار شوي جسمه رياضي
ودانه اخته عمرها 24 سنه متزوجه ولد عمتها فيصل عن حب وعندها بنت اسمها لين وهي حلوه ومرحه
فهد:السلام عليكم
عبير:وعليكم السلام هلا وغلا بأخي
فهد ببتسامه:هلافيك الا وين ابوي وامي
عبير:مدري
فهد يجلس:وشلون ماتدرين
ام فهد داخله:هلا بالغالي
فهد ببتسامه:هلافيك يا روح الغالي
ابوفهد وهو داخل قال ببتسامه:تتغزل في زوجتي وانا موجود
فهد ضحك بصوت عالي :شوف وجه زوجتك صار احمر
كلن طالع في وجه ام فهد الي تتمنى الارض تبلعها
عبير اخت فهد بنت حلوه وحبوبه عمرها 21سنه تحب ولد عمها خالد وهو بعد يحبها وهم مخطوبين لبعضهم
+++
في بيت العمه
غلا بدلع:يومه بروح لبيت خالي محمد
ام غلا بحنان :روحي بس لا تتاخرين
غلاتحب راس امها :من عيوني
غلا بنت عمرها 22 سنه تحب ولد خالها فهد وهي حلوه بس مغروره حيل
بعد مانامت اميره في صدر زياد شالها وحطها في السرير وبدل ملابسه وطلع لعمه محمد يمكن يقدر يلقى حل لمصيبته
+++
هنادي تكلم اختها حنين الي متزوجه ولد عمها فواز:انتي ليه معصبه
حنين:وشلون مااعصب وانتي تقولين زياد بيتزوج
هنادي:عادي ماهو اول رجال يتزوج


قديم 07-16-2012, 02:44 AM   رقم المشاركة : 3
:: سيدة رائعــة ::








افتراضي رد: رواية حبيته وجرحني تحملته وزاد في تجريحي كامله رومنسيه


حنين بعصبيه:ادري انه ماهو اول رجال بس زياد يحب اميره
هنادي:بس اميره ماراح تجيب له عيال
حنين:وشلون ماتجيب عيال يعني اذا ثنين ماتو كل عياله بيمتون
هنادي:انتي عارفه ان مافيه امل يجيهم عيال سليمين
حنين:ومن بيتزوج
هنادي:مدري
حنين عمرها 24 سنه حلوه متزوجه من ثلاث سنوات وعندها ولد اسمه زياد وهي في لندن لان فواز يكمل دراسته
فواز عمره 30 سنه يحب حنين مره ومايرفض لها طلب
+++
دخل زياد بيت عمه محمد
عبير ببتسامه:هلا وغلا بعمي الغالي
زياد ببتسامه باهته:هلا فيك وين ابوك
عبير:داخل
تجاوزها زياد ودخل على عمه ورد السلام
ابو فهد وفهد:وعليكم السلام
ابوفهد:استريح يابوك
بعد ماجلس زياد قال:طلبتك ياعمي
ابوفهد عرف زياد وش يبي فقال:ادري بطلبك وانا كلمت ابوك وهو مصر على رايه ويقول الخميس بيخطب لك بنت خالك
زياد بصدمه:يخطب لي
ابوفهد:والله هذا ماقال ابوك
زياد بقهر:بس انا مابي بنت خالي
فهد يتدخل:خلاص انت اختار
زياد بغضب :يصير خير وقام وطلع
+++
غلا تسلم على عبير:وش اخبارك
عبير ببتسامه:زينه انتي وش اخبارك
غلا وهي تدور فهد بعيونها:تمام الا وين خالي وفهد
عبيرتأشر لغلا تجلس :طلعو
غلا بخيبة امل:كان ودي اسلم على خالي
جلسو عبير وغلا يسولفون وغلا مصره ماتطلع الا اذا شافت فهد
+++
زياد طلع بسيارة يدور في شوارع الرياض يدور حل للمصيبه هذي
خالد"الزواج شي لا مفر منه بس انا لازم ادور وحده تكون اقل من اميره في كل عشان ماتحط راسها من راس اميره "ضحك خالد ضحكت استهزاء"وين بتلقاهاه ياخالد "
خالد رد البيت وسمع الخبر من هنادي
خالد بقهر:الله يعينك يازياد
هنادي :تكفا خالد دق عليه من العصر طالع مارد للحين





+++

دق خالد على زياد بس حصل جواله مقفل
خالد بخوف:جواله مقفل
هنادي :دق عليه يمكن محول جواله
خالد يدق جواله ويشوف مكتوب زياد
خالد يرد :هلا زياد وينك ليه مقفل جوالك
زياد يضحك:وش فيك
خالد بعصبيه:تضحك بلاك ماتدري وشلون انحاتيك
زياد بهدوء:لاتخاف مافيني شي ولا راح يصير شي اكثر من الي صار
خالد فهم قصده وقال:رد البيت ابيك
زياد :انشاء الله
خالد دكتور ومرح قليل مايعصب وفيه شبه من زياد بس خالد اسمر من زياد وعمره 27سنه
+++
غلا ملت وهي تتنتظر فهد ماجاء فضطرت انها تروح بيتهم لان فهد تأخر
دانه تكلم عبير
دانه:وعمي زياد وش قال
عبير:ماقال شي شكله بيوافق
دانه:مستحيل عمي يوافق يتزوج على اميره
عبير:غصب عليه عمي حالف عليه انه يتزوج والا يتبرى منه
دانه بقهر:حرام عليهم يعني اميره ما يكفيها مصيبتها يجون يزيدونها
عبير:انتي تعرفين عمي كل همه يشوف عيال عمي زياد
فهد يفتح الباب بشويش:بووووووووووو
عبير تقمز من السرير:خرعتني
فهد ببتسامه:من تكلمين
عبير ترد تجلس:دانه
فهد بسخريه :اكيد تقولين لها الي صار هذا انتم يالحريم
عبير بضحكه:اقول روح نام لاتشوف الحريم وش يسوون فيك
طلع فهد من غرفة عبير وهو يضحك على كلام اخته
+++
رد زياد البيت ولقى خالد جالس في الملحق ينتظره
زياد:السلام عليكم
خالد:وعليكم السلام
زياد بعد ماجلس:خير وش عندك
خالد ببتسامه:عندي الخير كله
زياد يرد له الابتسامه:قول يا ابو الخير
خالد يتكلم بجد:انت ليه رافض تتزوج
زياد بعصبيه حاول انه يخفيها:ليه رافض
خالد لاحظ عصبية زياد وقال:من غير انفعال خل نتكلم بالعقل انت عارف ان ابوي يبي يشوف عيالك واميره مستحيل تجيب اطفال يعيشون اكثر من اربعين يوم بسبب انك انت وهي تحملون جينات من نفس النوع تسبب في هالمرض

قديم 07-16-2012, 03:39 AM   رقم المشاركة : 4
:: سيدة رائعــة ::








افتراضي رد: رواية حبيته وجرحني تحملته وزاد في تجريحي كامله رومنسيه


زياد بقهر:بس انا راضي بحياتي
خالد :بس ابوي ماهو راضي
زياد يتنهد تنهيدت قهر:وانا علي انفذ رغبته
خالد :شوف انا عندي لك الحل
زياد رد بسرعه:قوله
خالد:شوف انت تزوج واذا جاك ولد طلق زوجتك لانك مستحيل تقدر تعيش معها وبكذا ابوي يرضى وانت تعيش حياتك
زياد يفكر:بس انا مابي اظلم احد واذا طلقت الي بتزوجها بظلمها وظلم الطفل معها
خالد:انت لا اول واحد ولا اخر واحد يطلق زوجته وعنده اطفال منها والطفل بيعيش معها وانت متى ماتبي تشوفه تروح له
زياد اقتنع بالفكره :بس من وين اجيب الزوجه هذي
خالد:سهله انا مستعد اجيب لك وحده من عايله فقيره وهلها مستعدين يبوعون نفسهم عشان الريال
زياد:من وين تجيبها هالعايله
خالد:عندي واحد في المستشفى يشتغل حارس فقير وعلى قد حاله وسمعت من الموظفين انه يصرف على زوجة اخوه وبنته واذا عرضت عليه فلوس بيوافق
زياد بستهزاء:ليه قالو لك ان الفقير ماعنده كرامه يبيع بنت اخوه
خالد بضحكة استهزاء:لا هو على فقره سكير تعرف وش يعني سكير
زياد بعصبيه:انت صاحي والا مجنون تبيني اناسب واحد واطي مثل هذه
خالد ببتسامة مكر:هذا المطلوب عشان لا طلقتها ماحد يلومك
زياد بتفكير:بس ابوي مستحيل يوافق اني اناسبه
خالد:لا تخاف اترك الموضوع علي كله بس ترى البنت كبيره
زياد بستفسار:يعني كم
خالد:يقلون في الثلاثين
زياد وحصل على مراده قال ببتسامه:هذا المطلوب
خالد:خلاص اتفقنا وانت اترك كل شي علي
زياد ببتسامه:بنشوف وين تبي تودينا افكارك
طلع زياد للجناح الخاص فيه هو اميره ولقى اميره تطالع في التلفزون واضح انها سرحانه دخل وجلس جنبها
وقال بشوق:اميرتي
اميره بروعه:يمه خوفتني ماحست فيك
زياد ببتسامه وهو ياخذ يدها ويحبها :ادري بس قولي في وش سرحانه
اميره نزلت دموعها على خدها لانها تذكرة هي في ايش سرحانه
زياد ضمها لصدره وقال بحنان:اميرتي ليه تبكين
اميره ترد وصوتها كله بكي:وشلون ماتبيني ابكي وانت بتتزوج
زياد ضمها لصدره بقوه وقال بألم:الله يخليك لا تبكين دموعك غاليه علي موتي ارحم ولا دمعه من عينك تنزل
اميره ترفع راسها من صدره وتحط عينها في عينه:بعيد الشر عنك
زياد باسها على خدها وقال:بقولك شي ابيك تفهمينه
اميره بحب:قول يا حياتي
زياد بجد:انا قررت اتزوج لكـ
حطت اميره يدها على فمه وقالت بكل حزن الدنيا:لا تكمل ارجوك
زياد يحب يدها الي على فمه ويمسكها بين كفوفه وقال بألم:هذا شي مقدر علينا لايمكن نهرب منه
اميره كأن احد طعنها في صميم القلب بسكين قالت ودموعها تعبر عن حالها:احفر قبري قبل يوم زواجك
وصلي علي مع المسلمين يوم زواجك ودعلي بالرحمه لامن زفوك
زياد ماقدر يرد عليها لان كلامها صدمه الا ذبحه مزق قلبه كل الي قدر عليه يضمها لصدره بأقوى ماعنده كأنه بيدخلها في جوفه عشان ما تروح منه
وفي الصباح
خالد ببتسامه:السلام عليكم
ابوزياد وام زياد:وعليكم السلام
خالد بتردد:يبه تسمحلي انا اخطب لزياد
ابو زياد يعرف خالد انه مايتدخل في موضوع الا يسويه فقال ليه ماقول ايه يمكن يقدر يسوي الي انا ماسويته
ابوزياد ببتسامه:خلاص انت اخطبله بس اول خله يوافق
خالد وهم نزاح عن صدره:ولا يهمك يبه
طلع خالد لدوام ودق على زياد بس لقى جواله مقفل
زياد قام وراسه مصدع لانه ما نام الا بعد صلى الفجر شاف اميره نايمه واثر الدموع على خدها حبها على خدها ولبس وطلع بيروح لشركه
خالد في الدوام يكلم ابو بدر
خالد يحاول يتكلم معه في كذا شي قبل مايبدى معه في الموضوع
خالد:الا انت كم راتبك
ابوبدر:الفين
خالد بعطف مصتنع:بس هذا مايسوي شي
ابوبدربقهر:شفت انه مايكفي اجل لو تدري اني اصرف على عايلتين وش تقول
خالد وصل لمراده:عايلتين كيف
ابوبدر:عايلةاخوي
خالد:اخوك متوفي
ابوبدر:أي متوفي من كم سنه وعنده ولد وبنت
خالد بمكر:طيب ليه ماتزوج البنت وترتاح من همها
ابوبدر:وانا جاني احد وقلت لا
خالد:والي يقولك ان عندي عريس لها وش تعطيه
ابوبدر بفرح:صدق
خالد بسخريه مغلفه:ليه لا بنت اخوك مافيها شي واكيد كلن يبها بس هي كم عمرها
ابوبدر:18 سنه

قديم 07-16-2012, 03:56 AM   رقم المشاركة : 5
:: سيدة رائعــة ::








افتراضي رد: رواية حبيته وجرحني تحملته وزاد في تجريحي كامله رومنسيه


خالد بصدمه:18 بس "اووووووف وش هالوهقه انا قالولي انها 30 سنه"

ابوبدر:وين سرحت ياطويل العمر
خالد قرر يكمل لعبته حتى لو عمرها 12 اهم شي يفك اخوه من الهم وهي كذا والا كذا ماراح تلقى احد يتزوجها الا اذا كان سكير زي عمها
خالد بجد:انا بخطب بنت اخوك لخوي وش قلت
ابوبدر بصدمه:وشووووووو
خالد"ماتنلام لو طلعت روحك من الصدمه تطول تناسب عايلة ال...."
خالد:هاه وش قلت
ابوبدر بفرح:طبعا موافق
خالد:بس عندي شروط
ابوبدر:تامر انت
خالد:اول شي مابي احد يعرف في الدوام اني خطبت منك لخوي ثاني شي اخوي بيتزوجها بس عشان يجيب منها ولد بعدين بيطلقها وبنعوظها بالي تبي من المال والزواج بيكون الخميس الجاي مافيه لا طق ولا غيره بس بيملك عليها وياخذها وتراه متزوج
ابوبدر بمكر:وانا وش لي من هذا كله
خالد بضحكة استهزاء:بعطيك ميتين الف وش قلت
ابو بدر ماصدق الكلام الي يسمعه ميتين الف مره وحده مسكين يابو بدر
ابوبدر:خلاص تم
خالد ضحك بصوت عالي على شكل ابوبدر وقال"فرحان بالميتين الف يالحقير وتشوفه كثير على تعاسة بنت اخوك"
كلم زياد خالد بشوف وش صار معه
خالد بضحك:مبروووك ياعريس
زياد عوره قلبه من هالكلمه وقال:وش صار معك
خالد:كل شي تمام بس انت جهز نفس الخميس عشان تتزوج
زياد بصدمه:انت وش تقول
خالد:الي سمعت عشان مابي احد يعرف هي من أي عايله فهمت
زياد فهم وجهت نظر خالد وقال:خلاص بس ابوي كيف بيروح يخطب
خالد بستهزاء:يروح يخطب لا انت تبي ابوك يذبحني ويذبحك
زياد بحيره:اجل كيف بتزوج
خالد بثقه:اترك الموضوع علي




الجزء الثاني
اميره قامت لقت زياد طالع فخذت شور ولبست فستان لونه ابيض فيه ورود لونها وردي وحطت ميك اب خفيف عشان تخفي التعب والحزن ونزلت تحت
هنادي ببتسامه:هلا وغلا
اميره ببتسامه باهته:هلافيك الا وين خالتي
هنادي تاخذ كاس الشاي من فوق الطاوله:خالتك طالعه
اميره تجلس على الكرسي وتاخذ لها توست تبي تحشيه :وين طالعه
هنادي:عمتي ام فهد عازمتها على قهوة الضحى
اميره:ايييي
هنادي قالها خالد كل شي بالتفصيل فحبت تخبر اميره عشان ترتاح ان زواج زياد مجرد تنفيذ طلب لا غير
هنادي بتردد:زياد خطب
طاح التوست من يد اميره وقالت بصدمه:متى
هنادي قالت لاميره السالفه كلها تبيها ترتاح وتعرف ان الي بياخذها زياد من عايله ماتسوى فأكيد هي مثلهم
اميره ودموعها على خدها:اكيد بيطلقها
هنادي بثقه:اكيد حتى ابوي اذا عرف هو الي بيقوله طلقها بس اهم شي محد يعرف الا اذا جابت ولد او بنت المهم انها تخلف
اميره خمدت جزء من النار الي في قلبها يعني زواج زياد شي مؤقت وهي المستفيد لانها بتربي الولد ويصير ولدها
بعد الغداء
خالد:يبه انا لقيت خطيبه لزياد وزياد موافق
ابوزياد بفرح:زين يابوك ومتى تبي نروح نخطبها
خالد:بس فيه مشكله
ابوزياد بحيره:وشي المشكله
خالد يضحك في نفسه "احس اني اكبر نصاب"
خالد بجد مصتنع:البنت مالها الا اخ صغيرو أمهاكبيره في السن ومالها احد غير واحد معي في الدوام قريبهم من بعيد والبنت كلن يمدحها
ابوزياد يقاطعه:واحنا وش يخلينا نروح بعيد وبناتنا موجودات
خالد:هذي رغبت زياد يبي وحده من برى العايله مابي مشاكل كل يوم وحده تقوله فلانه سوت وفلاته قالت
ابوزياد:حتى لو تزوج من برى العايله مصيرها بتدخل في العايله وتعرفهم
خالد:زياد بيتزوج وبيسكنها في بيت لحالها ومايبي احد يدخل معها كثير تعرف الحريم مايجي منهم الا وجع الراس
ابوزياد اقتنع اهم شي عنده زياد يتزوج وجيب عيال غيره مايهمه
ابوزياد:خلاص نروح رجال نخطبها
خالد"هذي المصيبه الحين كيف اتصرف"
خالد يفكربعدين قال:من من نخطبها هي ماعندها احد الا واحد من بعيد
ابوزياد:اجل وشلون نخطبها وهي مالها قريب رجال نتفاهم معه وانتم ماتبون الحريم يتدخلون في الموضوع
خالد:انا تكلمت مع قريبهم وتفقت معه ان زياد ياخذ البنت ويملك عليها في المحكمه وياخذها بعد كذا وانا وفهد بنروح شعود
ابوزياد بتفكير:والله اني ماني مقتنع بالموضوع كله احس فيه شي
خالد"ماتفوتك يابوزياد"
خالد بمكره المعتاد:معك حق بس اهم شي عندنا زياد يتزوج ومدام البنت سمعتها زينه واهلها بعد وين المشكله
ابوزياد:على بركة الله
فهد بدهشه:معقوله زياد وافق
خالد:أي وافق لان البنت من برى العايله بس يبينا نشهد
فهد بعدم اقتناع:انشاء الله
خالد بعد ماوقف:يالله انا بروح ونتواجه بكره الساعه 10 في المحكمه
فهد يقوم معه:انشاءالله
طلع خالد وصادف عبير راده من الكليه
خالد اول ماشافها شال النظاره عن عيونه وقال ببتسامه:ليه متأخره
عبيربخجل:هذا وقتي ماني متأخره
خالد يطالع فيها وده يشيل هالعباه الي حارمته من شوفت وجها
عبير شافته بياكلها بنظراته جت بتتجاوزه لكنه مسكها مع يدها وهمس احبك
عبيرحررت يدها من يده ودخلت بسرعه
خالد ضحك ورد نظارته على عيونه وطلع
دخلت عبير البيت وشالت الغطوه وشافت وجها في المرايه صاير احمر "ااااااااه ياقلبي احبه احبه"
ريم:معقوله اتزوج وانا باقي ماخلصت دراسه
ابوبدر:كملي بعد الزواج وترى الرجال متزوج
ريم شوي وتبكي:عمي ارجوك انامابي اتزوج
ابوبدربعصبيه:بتزوجين غصب عليك وبكره الملكه فاهمه
طلع ابوبدر وترك ريم تبكي وحالتها حاله
ام ريم:ريم حبيبتي لاتبكين يمكن يصير الزواج خير لك
ريم بين شهقاتها:وشلون خير لي والرجال متزوج وغني يعني انه شاريني ومتى ما مل بيرميني
ام ريم:خلي ايمانك بربك قوي وانتي تعرفين عمك مستحيل يرد عن رايه
طلال يدخل هو بدر ولد عمه
طلال:ريم وش فيك
ريم مسحت دموعها وقالت ببتسامه مصتنعه:مافيني شي
بدر توه صغير عمره 8 سنوات
بدر:ابوي زعلك
ريم:لا

قديم 07-16-2012, 03:56 AM   رقم المشاركة : 6
:: سيدة رائعــة ::








افتراضي رد: رواية حبيته وجرحني تحملته وزاد في تجريحي كامله رومنسيه


دخلت ام بدر وعورها قلبها على ريم بس مافي يدها شي تسويه
ام بدر بحب:ريم ياقلبي قومي نروح لسوق عمك عطاني 3000 نشتري لك كذا فستان وغرض للعرس
ريم بصوت عالي:مابي مابي
ام ريم:يمه الي تسوينه ما منه فايده
ام بدر:ريم ياقلبي قومي معي يادوب نخلص لان الرجال بيملك وياخذك لبيته على طول
ريم ضاقت فيها الدنيا وعرفت انها مالها سند في هالدنيا والي يبيه عمها بيسويه فنساغت لوامرهم كأنها دميه يحركونها على كيفهم
خالد يكلم ابو بد
خالد:عطيت البنت الفلوس كلها
ابو بدر:أي عطيتها العشره كلها
خالد:اجل يالله بكره اشوفك
زياد طول الوقت مشغول يجهز فلته الصغيره الي في حي بعيد عن حيهم
زياد يكلم صاحب اكبر محل اثاث في الرياض:ابيك اتأثثها من كل شي خلال اسبوع
صاحب المحل:انشاء الله
طلع زياد من المحل ودق على فهد
فهد:هلا بالقاطع
زياد بضحكه:انا القاطع والا انت
فهد:اقول لايكثر انت وينك فيه
زياد:لايكثر هاه اجل ضف وجهك
فهد:هههههههههه خلاص يابوك بس قول انت وينك
زياد:أي كذا تأدب انا دقيقه بمرك
فهد:يالله انتظرك
هنادي تكلم عبير:تعالي لنا البيت
عبير:لا تعالي انتي
هنادي:بس انا استحي
عبير:اقول خلي عنك الدلع وتعالي دانه اختي بتجي وغلا بعد
هنادي اول ماسمعت اسم غلا ضاق صدرها تدري ان غلا تبي فهد بس هي ماتدري وش شعور فهد ناحيتها
هنادي:خلاص بجيكم العصر
عبير:بنتظارك
سكرت هنادي من عبير وقامت تشوف وش تلبس طلعت لها بنطلون جينزمع بلوزه بيضاء طويله شوي للركبه وكانت على قصه حلوه مطلعه تفاصيل جسمها وحطت ميك اب خفيف
تجمعو البنات عند عبير وقت العصر الا اميره الي عتذرت لانها تعبانه شوي
غلا بدلع:عبير ابي مويه
عبير:من عيوني الحين اجيب لك مويه
غلا ردت بسرعه:لا انا ابي اروح اجيب بنفسي تعرفيني مااحب اشرب من يد احد
عبير:براحتك
طلعت غلا وهي مع الدرج سمعت صوت فهد في غرفته يكلم ففكرت كيف تخليه يطلع ويشوفها شافت بازه كبيره محطوطه في الممر ظربتها برجلها وطاحت ونكسرت فطلع لها صوت فسوت نفسها انها دايخه وضربتها ماحست
طلعو البنات على الصوت وفهد في نفس الوقت وكانت غلا جالسه ماسكه راسها
دانه تمسكها:غلاحبيبتي فيك شي
غلا بصوت حاولت يكون ثقيل:مادري احس بدوخه
هنادي عيونها معلقه بين فهد وغلا تبي تشوف ردت فعل فهد اذا حست انه يحبها بتقفل على حبه في قلبها
فهد بهدوء وهو صاد:تبين المستشفى
غلا ودها تذبحه كل هذا وماعبرتني
عبيرجابت عبات غلا وقالت :غلا خوذي عباتك تغطي
غلا في نفسها "من قالك جيبي عباتي"
اخذت دانه العباه وغطت غلا بشكل غير مرتب
فهد اول ماغطوها قال:يالله نوديها المستشفى
غلا بقهر ماهو واضح:لامابي المستشفى بس دخلوني داخل
جت هنادي بتشيل مع دانه غلا لكن وهي تمشي دخلت قطعه من البازه في رجلها
هنادي صرخت بصوت عالي :اااااااااااااه
عبير تمسكها:اجلسي رجلك كلها دم
جلست هنادي وهي تتألم
فهد يقرب منهن:جيبي عباتك بنوديها المستشفى
زياد يرد السلام على ام فهد وامه
ردن السلام عليه
زيادوهويحب راس امه قال ببتسامه:اخبار العجوزات
ام زياد:عجوزات في عينك ماعجوز غيرك
زياد:هههههههههههه اذا انا عجوز اجل انتي وش
ام فهد تضحك:هي ست البنات
ام زياد:اسمع الكلام الزين ماهو كلامك
زيادبضحكه قال:اكيد من شاهد للعروسه
ام زياد تضربه بمخده صغيره :اقول انقلع
زياد :افا تطرديني
ام فهد:يابوك خل عنك مناقر امك وروح لفهد في غرفته
طلع زياد فوق وشاف هنادي جالسها
زيادبخوف:هنادي وش فيك
غلا قامت اول ماشافت زياد لانها تعرف انه يعرف هالحركات ومستحيل تمر عليه زي الباقين
هنادي بصوت خفيف:وطيت قطع من البازه المنكسره ودخلت في رجلي
زياد يمسك رجلها ويشوف الجرح لقاه صغير بس جاي على عرق في الرجل لذلك صب دم كثير
زياد بمكر:اوووووه لاهذا يبي له خياطه
هنادي بخوف:والله
زياد بجد مصتنع:أي يالله قومي بوديك لا يذبحك
هنادي بكت بصوت عالي
زياد ضحك بصوت عالي:ايا البزره الحين تصدقين كل شي
هنادي بين شهقاتها بشكل طفولي قالت:ياكذاب
فهد ابتسم على رد هنادي
زيادببتسامه:الحين تقولين لخوك ياكذاب
فهد:تتستاهل
زياد يرفع نظره في فهد :انت من متى هناء
فهد ببتسامه:من زمان

قديم 07-16-2012, 03:57 AM   رقم المشاركة : 7
:: سيدة رائعــة ::








افتراضي رد: رواية حبيته وجرحني تحملته وزاد في تجريحي كامله رومنسيه


زياد:الحين انت ماتستحي جالس وسط البنات
فهد طاح وجهه وقال وهو طالع:اقول لاخلصت تعالي في غرفتي
دانه:حرام عليك ليه تقول لفهد كذا
زياد ببتسامه:تكلمت محامي فهد وانا صادق خير جاي هناء
عبير:هو سمع صوت البازه يوم طاحت وجاء
زياد يأشر بيده وهو طالع:خلاص حصل خير
ردت ريم وعمتها ام بدر من السوق وشرن بعض لاشياء مثل فستان ناعم للزواج وشرت ام بدر كذا قميص للنوم وكذا لبسه وكذا عطر ومجموعه من ادوات المكياج
ام بدر:ريم خل نمر المشغل نقص شعرك
ريم بحزن:كيفك عمتي
مرن المشغل وسوت لها كذا شغله مثل تنضيف للبشره وقصت شعرهامدرجات على طوله
عبير تلف رجل هنادي
هنادي:والله اني متفشله من فهد
غلا بقهر:ليه تتفشلين فهد ماجاب خبرك لانه مشغول فيني
عبير ببرائه:ليه انتي ماشفتيه يوم ابتسم يوم تقول لزياد ياكذاب كأنها بزر
هنادي بحياء:وافشلتها
غلا ماتت قهر من الوضع لان خطتها فشلت
دانه ببتسامه:ماعليك منه انتي كنتي بعباتك ونقابك
كملن البنات سهرتهن وغلا طول السهره متنكده
دخل زياد الجناح الخاص فيه
اميره ببتسامتها العذبه:هلاحبيبي
زياد يرد لها لابتسامه ويمسك يدها ويدخلها معه في الغرفه
زياد يجلسها على السرير ويجلس عند رجلينها على الارض وهو مازال ماسك يدها
زياد بجد:اميره الله يخليك اسمعيني من غير دموع
اميره تحط يدها على فمه وقالت بحب:لاتقول شي هنادي قالتلي كل شي
زياد وهم انزاح عن صدره قام وضم حبيبت عمره وحياته واميرته وكل شي في حياته

في الصباح
راح ابوبدر وزياد وخالد وفهد للمحكمه عشان يملكون لزياد
بعد الملكه قال زياد لبوبدر:وين بيتك عشان بجي في الليل اخذ العروس قالها بسخريه
ابوبدر وصف له البيت
رد زياد لشركه ومعه فهد
فهد:منت مسوي فرح
زياد بسخريه:الا بسوي فرح عشان الناس تشوف انا مناسب من
فهد بحيره:طيب ليه ناسبتهم يوم تشوفهم مايشرفون
زياديشتغل في اوراق قدامه:اهم شي ماحد يدري زين
فهد وهو قايم بيطلع:انشاءالله
عبير:هنادي يالله بسرعه
هنادي نازله مع الدرج:يالله جايه
سكرت هنادي الجوال وطلعت لعبير برى مع السواق بيرحون للكليه داهم السواق للجامعه
وكان باقي على محاظرتهم ساعه فجلسو على طاوله في الكوفي حق الجامعه يسولفون
عبير:هنادي بسألك سؤال
هنادي:تفضلي
عبير بتردد:انتي تحبين اخوي فهد
هنادي بصدمه:وشتقولين انتي
عبيربصرار:لاتنكرين انا شفت الشوق في عيونك لفهد امس
هنادي :يتهيألك
عبير:لا ما يتهيألي انا اعرف نظرات الشوق
هنادي نزلت دموعها
عبير بخوف:هنادي ليه تبكين
هنادي:مافيه شي
عبير اصرت على هنادي لين عرفت ليه تبكي
عبير:مدامك تحبينه ليه تبكين
هنادي:خايفه انه يحب غيري
عبير:ههههههههه فهد يحب
هنادي بدهشه:ليه لا
عبير بجد:شوفي انا اكثر وحده اعرف فهد فلو انه يحب كان انا اول من بيعرف
هنادي بستفسار:وغلا مايحبها
عبير ضحكت ضحكه رجت المكان
هنادي:وجع ليه تضحكين
عبير تحاول توقف ضحك:لان فهد مايحب جرات غلا ودايم يقولي قوليلها تحتشم اكثر
هنادي ارتاحت من هم غلا بس كيف تعرف اذا فهد يحبها او لا
رجع كلن من دوامه
ابوزياد :خلاص ملكت
زيادببرود:أي ملكت
ام زياد:الله يرزقك الذريه الصالحه
ابوزياد:متى بتروح تاخذها
زياد:في الليل
ام زياد :وين بتسكنها
زياد وبتدى يمل من كثر الاسئله في الموضوع:شاري لي فله وبسكنها فيها
ابوزياد حس ان زياد مل من الموضوع فقال:روح ارتاح وانا ابوك
طلع زياد لجناحه
كانت اميره لابسه قميص من الحرير قصير وناعم وفاكه شعرها وجالسه تبخره
زياد ببتسامه وهو يمسك المبخره:خليه انا ببخره
اميره ترفع شعرها عن وجها وببتسامه قالت:اخاف تحرقه
زياد يقبصها على خدها بخفه:انا احرق شعر اميرتي
اميره تنزل المبخره على الطاوله
ماودك تنام قبل الصلاه
زياد يمسكها مع خصرها ويقربها له :الا بس انتي طيرتي النوم
اميره بدلع:انا اطير النوم
زياد يشيلها بين يديه قال وهو يضحك:أي انتي
في بيت ابو فهد
عبير تكلم فهد:انت تحب احد
فهد اعتدل في جلسته وقال:ليه تسألين
عبير:بصراحه فيه وحده تحبك
فهد بسخريه:والله
عبيربقهر:لا تتمسخر علي انا اكلمك جد
فهد بجد:وانا ماني فاضي لخرابيطك
عبير:على العموم انا بقول من الي تحبك وانت وضميرك
فهد:ههههههههههههه ليه تبيني اخطبها
عبير بجد:ليه لا
فهد بملل:يالله قولي من بنام
عبير وهي قايمه قالت:هنادي بنت عمي
فهد بصدمه:هنادي

قديم 07-16-2012, 03:58 AM   رقم المشاركة : 8
:: سيدة رائعــة ::








افتراضي رد: رواية حبيته وجرحني تحملته وزاد في تجريحي كامله رومنسيه


طلعت عبير من غرفة فهد وتركته في حيره من امره
فهد"معقوله هنادي تحبني بس انا ما احبها ولا احس ناحيتها بأي شعور "
احتار زياد يكشخ او لا مايدري وش يسوي بس قرر انه يروح بشكله الطبيعي لبس ثوب وشماغ وتعطر وجاء بيطلع
اميره:حبي وين بتروح
زياد ببتسامه باهته:اوووه هو انا ماقلتلك
اميره بحيره:قلتلي وش
زياد يقرب منها ويبوسها على خدها وقال ببتسامه عذبه:عندي شغل في جده يومين
اميره تضمه لصدرها:ليه ماقلتلي من بدري
زياد يمسح على شعرها:غصب علي جت فجئه
اميره تبعد عن صدره وتبوسه على خده:تروح وتجي بالسلامه
زياد ببتسامه:الله يسلمك يالله ياقلبي تأخرت وباسها على خدودها وطلع
اميره حست بضيق ماتدري ليه فقالت خلني اروح لهنادي اتسلى معها
زياد طلع وركب سيارته وتوجه لبيت ابوبدر
ام بدر اصرت على ريم تتزين عند مشغل لكن عشان الفلوس قليله سوت ميك اب عادي ولبست فستان سكري قصير انزل من الركبه بشوي كمه كت وعليه شريطه من الوسط لونها احمر فيها ورده كبيره في الوسط ولبست انعال لونها سكري وكانت بكعب خفيف عشان تعطي الفستان شكل وشعرها خلته بلف خفيف عشان يكون شكله حلو وحطت عطر من شنل
ابوبدر:حيالله من جانا
زياد بشمئزاز:الله يحيك الا وين العروس بمشي
ابوبدر:دقيقه طال عمرك
طلال طلع لزياد وقال:انت زوج ريم
زياد ابتسم للولد لا ارادي:أي انا زوجها
طلال يمد يده يسلم على زياد ومد يده زياد له
طلال بجد:دير بالك على ريم
زياد بستفسار:انت وش تقربلها
طلال بفخر حس فيه زياد:اخوها
ام بدر:يالله ياريم زوجك يبيك
ريم بخوف:اطلعي معي يمه
ام ريم تمسك يد ريم:تعالي يمي بروح معك
لبست ريم عباتها وتسترت مابين منها شي ابد وطلعت مع امها لحد باب الشارع بعدين امها نادت طلال الي جاء
طلال:سمي يمه
ام ريم ودموعها على خدها:خذ اختك لزوجها
طلال مسك يد ريم واخذها لزياد الي كان ينتظر وهو مشمئز من كل شي
زياد اول ماشاف زياد ماسك يد بنت عرف انها ريم كان طولها متوسط وجسمها وسط بس يميل لنحف اكثر غير كذا ماقدر يشوف
زياد ركب السياره وفتح الباب لها
طلال ببتسامه:يالله ركبي ياحلى عروس
ريم ودها تصرخ وتقول لا بس الخوف منعها
زياد مل وهو ينتظر فقال بعصبيه:بسرعه خلصيني
ريم خافت من صوته وركبت وصك الباب طلال بعد ماحط الشنطه في السياره من ورى
تحرك زياد بالسياره وشغل المسجل يتسلى فيه لين يصل للفندق ماحاول يفتح معها أي حوار
وصل زياد للفندق وكان فخم
نزل زياد وقال:يالله انزلي
نزلت ريم وهي ميته خوف مشى زياد وريم تمشي وراهاخذ المفتاح وامرهم يجيبون الاغراض طلع للجناح الخاص لهم وكان عباره عن صاله صغيره فيها تلفزيون وكنبه طويله وكنبه ثانيه صغيره وفيها غرفه كبيره وكانت غرفة النوم
دخل زياد وجلس على الكنبه
دخلت ريم وهي منزله راسها وقفت عند الباب كأنها مستعده للهرب
طالع فيها زياد بعدين قال:صكي الباب
صكت ريم الباب وقفت مركيه ظهرها عليه وكل مافيها يرجف من الخوف لانها مع انسان عمرها ماشافته ولا سمعت عنه
زياد يأشر لها بيده :روحي للغرفة وطي عباتك
ريم دخلت بسرعه الغرفة وسكرت الباب وتنفست براحه لانها اخيرا صارت لحالها وطت عباتها وطالعت شكلها في المرايه كان شكلها مرتب لفت بنظرها في الغرفه بعدين جلست على حافت السرير
زياد مل وهو جالس برى فقال في نفسه"خلني اروح اشوف هذي وش تسوي"
فتح زياد الباب وشافها جالسه على السرير ومنزله راسها وشعرها مغطي وجها


برنامج تكسير الدهون وازالة السيلوليت بدون عمليات 6 جلسة 1200 ريال 0112499111_0554171121 اتصلى بنا
تجديد نضاره البشره ..التخلص من اثار حب الشباب واثار الجروح والحروق بجهاز الفراكشنال ليزر العجيب .. اتصلي بنا الرياض 0112499111 _0554171121

إضافة رد



رواية حبيته وجرحني تحملته وزاد في تجريحي كامله رومنسيه

أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

منتديات سيدتي - موقع سيدتى - سيدتي النسائي

المواضيع المتشابهه
الموضوع كاتب الموضوع المنتدى مشاركات آخر مشاركة
رواية ابي انام بحضنك كامله هموسة المهووسة الروايات 436 07-06-2012 10:04 AM
طلبتك لا تحاكيني روايه سعودية رومنسيه جريئه كامله &الدنيا حلووه& الروايات 3 07-29-2011 07:58 PM
[ رواية ] لــــبى قــــلبكــ [ كامله ] مرهفه المحبه المواضيع المكررة 1 04-25-2010 11:20 AM
[ رواية ] لــــبى قــــلبكــ [ كامله ] مرهفه المحبه المواضيع المكررة 0 04-25-2010 11:05 AM
رواية انت لي كامله من البدايـه الى النهايـه مكيفه المواضيع المكررة 8 09-28-2009 01:10 AM




Powered by vBulletin® Version 3.8.7, Copyright ©2000 - 2014, Jelsoft Enterprises Ltd.
SEO by vBSEO
منتدى سيدتي النسائي منتدى مستقل تابع لشركة اد ان توب وليس له علاقه بأي جهة أخرى
Privacy Policy

Facebook Twitter Twitter