الصورة الرمزية بنوته مدينيه
05-27-2009, 11:55 صباحاً

كانت قاعده في الصاله تتفرج على التلفزيون...دخلت مرة عمها وشافتها مرة عمها
وضايقها انها قاعده مرتاحه....

ام عبد العزيز :"اقول انتي قومي ساعدي الشغاله في الغدا"
بسمه وهي طالعه : "ان شاء الله"
وهي طالعه كانوا بنات عمها نزلين الصاله...

هند :"احسن انها طلعت يكرهي لها"
ام عبد العزيز وهي تبتسم :"لا وابشرك قريب بتذلف من هاالبيت"
التفتوا ثنتينهم لامهم...
هدى :"اشلون بتذلف؟؟"
ام عبد العزيز :"انخطبت امس من واحد"

هدى قاطعت امها وهي تحس بالغيره :" ومن هو هالمنحوس اللي خطبها"
ام عبد العزيز وهي تضحك :"هالمنحوس اكبر من ابوك ومتزوج ثنتين"
هند :" اكيد غني "
ام عبد العزيز :"هو غني غني بس بخيييييييييييييل"


هدى : "هههههههههه احسن خليها تذلف عنا "
اللي ما يدرون عنه ان بسمه كانت راجعه تسأل مرة عمها متي يبون الغد وسمعت كل شي

%%%%%%%%%%%

في المغرب في بيت ابوخالد كانوا قاعدين في الصاله...
ام محمد وهي توجه كلامها لبدريه :"وينك يابنيتي قطعتينا مانشوفك"
بدريه :"تدرين بعد ياخالتي ..مشاغل البيت والعيال"
ام محمد :" هذي ساره حتى بعد التوم وتسأل وتزور"
عبير:"حتى المناسبات ماتحضرينها
بدريه :"عاد المناسبات ماافضى لها... تصدقين عساني بس اقدر احضر خطوبة خالد"


كل الانظار اتجهت لعبير عشان يعرفون ردة فعلها...اللي بان عليها هي وامها الصدمه الشديده...
ام محمد : "اشوف يام خالد خطبتوا لخالد وما قلتي "
ام خالد :"لا والله ياوخيتي ما صار شي توه هو وافق وطلب من بدريه تدور له"
عبير وهي تحاول تبان طبيعيه : "اش معنى بدريه؟؟"

بدريه تبي تقهرها:"والله عاد اخوي يثق في ذوقي ..الا ياخالتي متى خطوبة عبير"
ام محمد بضيق :" ما تحدد للحين...الا انتي فيه احد في بالك؟؟"
بدريه :" بصرااحه لا "
ساره وريم على الرغم من حبهم لاخوهم مستحيل يرشحون احد للزواج من اخوهم...
من حبهم لعبير وكانوا متأملين عودتهم لبعض ....

*************
كانت في غرفتها ...ماكان لها نفس في الاكل ...وكيف يكون لها نفس عقب ما سمعت كل شي ...يالله كنت صابره على عمي واهله ومتحمله الطق والاهانات على امل الله يرزقني باابن الحلال يريحني من كل هذا ..آه من عمي اللي يبي يرميني هالرميه...
حطت راسها على المخده ومو قادره تتحكم في دموعها ....... سمعت صوت آذان صلاة العصر رددت الاذان مع المؤذن وقامت تتوضا وتصلي وتدعي ربها ...يفرج كربتها...

****************



دخلت البيت وهي معصبه ورمت عباتها وشنطتها على الكنبه.....
-"شفتي يمه خالد بيخطب"
ام محمد :"يابنتي استهدي بالله ما ظني خالد يسويها"
عبير :"بموت يمه لو خالد يتزوج"
ام محمد:"انتي الغلطانه لو ما طاوعتي ابوك ماكان فسخ الخطبه"
عبير:"ابوي بغى يذل ابوه وعمه وكنت متاكده ان خالد مستحيل يتخلى عني بهالسهوله"
ام محمد:"اذا كان خالد يحبك مره فهو يدور رضى ابوه الف مره"
عبير:"لا مستحيل......خالد يكون لغيري"
ام عبير:"هو اكيد ماوافق الا لما قالوا له انك مخطوبه"



عبير:"اي خطبه المفروض انه هو اول واحد يدري اني مستحيل اوافق على غيره"
ام عبير:"اش يدريه واحنا قلنا لهم انك انخطبتي"
عبيروهي معصبه:"كل اللي صار بسبب محمد"
قاطعتا امها بعصبيه :عبير كل شي صااار برضاك وما احد غصبك...انا الحين شايله هم اخوك اللي اختفى من بعد ماطلق مرته"
عبير:"انتي تدرين انه مسافر وكل شوي يتصل زميله يطمنا عليه"
ام محمد:"بس هو ليش مايتصل"
عبير بلامباله:"ماادري عنه "


ام محمد هي اخت ام خالد الكبيره عيالها هم محمد وعمره 33سنه يشتغل في شركة ابوه....كان متزوج العنود بنت عم خالد ....وعبيروعمرها20سنه....عبيرفائقة الجمال وتبهر الكل....قمه في الغرور والتكبر وانانيه ماتهتم الافي نفسها....


كانت حاضره بجسمها وعقلها وتفكيرها في عالم ثاني...
دزتها امل من كتفها ..
امل :" الابله تسألك "
بسمه بشرود :"هااااا"
ابله شيخه : "اللي واخذ عقلك يتهنا به ...الظاهر ما انتبهتي لسؤال"
نزلت راسها وهزته ...حست ابلتها ان فيها شي لانه مو من عاداتها ...ولانها من اشطر طالبات فصلها....
ابله شيخه:" تعبانه يابسمه ..".



بسمه : "لا موتعبانه بس سرحت شوي "
ابتسمت لها :"خلي عنك السرحان انتي في ثالث ثانوي"
جلست وهي في اسوء حالانها امل ودلال حسوا ان بسمه فيها شي اجلو اسألتهم لها لما يطلعون...
رن الجرس وطلعوا البنات ...
راحوا مكان منعزل شوي حتى ياخذون راحتهم...
امل : "اشفيك بسمه احسك منتي طبيعيه "
بسمه بحزن : "ما فيني شي ..."



دلال :"بسمه مستحيل اكيد فيك شي ..."
تنهدت بسمه : "خلوها على الله الدنيا ماهي واسعتني من الضيقه..."
امل : "عسى ما شر ..."
بسمه بحزن :" الا الشر بعينه وعلمه "...خنقتها العبره وما قدرت تكمل...
سكتوا حتى هدت شوي ...ولما تمالكت نفسها مسحت دموعها ...
ولما خبرتهم بكل اللي صار رفعت عيونها الحزينه لهم ... :"عطوني حل اش اسوي بعمري..."



امل بتهور:" اهربي وروحي لخالتك..."
بسمه ابتسمت بحزن :"اهرب وين انتي عايشه ....وحتى لو هربت على قولتك بيصير مشاكل مالها اخر واللي بينتصر في الاخير عمي..."
امل:"الدنيا مهي فوضه....مافيه احد يزوج البنت غصب عنها..."
بسمه:"لا فيه كثييييييييير ياامل يزوجون بناتهم غصب عنهم ولااحد داري عنهم..."



امل : "يعني هو خلاص خطب ..."
بسمه : "حسب اللي سمعته هوكلمه قبل لا يسافر وبيرجع عقب شهر وبيصير كل شئ رسمي ..."
دلال : "يابسمه ما في يدينا شي نقدر نسويه وانت ما لك الا الكريم ...ولا تنسين ان باب الدعاء مفتوح ...ادعي ربك وهو قريب مجيب لدعاء عباده ولا تيأسي من روح الله.."


ارتاحت بسمه لكلام دلال ...
وابتسمت باسى : "ولله انك صادقه وانتو بعد لا تنسوني من دعاكم ...كلامك يادلال ينحط على الجرح يبرى ..."
ابتسمت امل :"وانا كلامي يزيد الجروح...."
بسمه :"اش دعوه انتي الخير والبركه...الله لايحرمني منك جميع..."

اللهم لك الحمد كما ينبغي لجلال وجهك وعظيم سلطانك



ما شاء الله تبارك الله
اللهم صل وسلم وبارك على سيدنا محمد
الصورة الرمزية بنوته مدينيه
05-27-2009, 11:58 صباحاً
في الجامعه كانت عبير وريم وصديقتهم مشاعل مع بعض ...
عبير : "للحين ما تدرين من اللي بتكون خطيبة خالد "
ريم : "ما ادري للحين ......ما اتمنى احد يكون مرة اخوي الا انتي ..."
مشاعل اللي كانت عارفه كل شئ :"اخطبيني انا لاخوك ...شوفي اش ملحي ..."
عبير بغيره : "من زينك ..."


مشاعل مازحه :" انتي ليش تغارين ..."
عبير : "مشاااااعل ...ترى نفسيتي اليوم زفت"
مشاعل عشان تغير الموضوع : "ما سألتيني اش صار مع سعود"
عبير : "نسيت قولي اش صااار"
ريم : "لحظه ...لحظه انا صايره مثل الاطرش في الزفه اش السالفه ..."
مشاعل : "امس كنت انا وعبير في السوق ...وواحد رمى رقمه علينا ...واخذنا الرقم والبارح كلمته ....ياويل قلبي يازين صوته وسوالفه اللي تسحر ...."


ريم اللي ماشدها في الموضوع الا شي واحد : "عبير انتي تاخذين ارقام من شباب ..."
تفاجئوا ردت مشاعل عشان تنقذ صديقتها : "لا...عبير تقول اخلاقها ما تسمح ..."
ابتسمت ريم : "وهي صادقه وبعدين انتي مكالماتك ذي بتوديك في داهيه ..."
مشاعل : "اسكتي انتي واللي يعافيك ...انتي لوتجربين مره ...كان تنسين الملل اللي تشكين منه ..."

ريم : "لااااا انا مرتاحه في مللي بس انتي اللي ...."
مشاعل مقاطعه : "الموضوع كله تسليه ما يتعدى المكالماااات...."
هزت ريم راسها بعدم اقتناع..........




%%%%%%%%%%%%%%%%%


-"ترى البيت من من دونك ما يسوى...قلل هالسفريات..."
ابتسم لها بحنان :"لها الدرجه تشتاقين لي ..."
-"اكيد اشتاق لك منت ابو عيالي...."

-"ابوعيالك بس .."
ابتسمت وسوت نفسها مو فاهمه قصده :"اش اكثر من ابوعيالي"
-"تدرين يابدريه احسن ادور لي وحده تحبني كزوج مهو (وهو يقلدها ) ابوعيالي "
بدريه : "مواااافقه بس بشرط ..."
عبد الله وهو يقرب منها ومسوي نفسه فرحان :"اشرطي على كيفك كم بدريه عندي ..."
بدريه: "تكون على ذوقي ..."
عبد الله : "هونت مابي اتزوج..."
بدريه:"ههههههههه لها الدرجه ذوقي مو حلو .."


عبد الله :"تبين الصدق ....ذوقك مو حلو....بس انتي اللي حلوه..."
بدريه : "صرت الحين حلوه من اللي قبل شوي متلهف على الزواج ؟؟؟"
عبد الله :" ههههههه ...الا على طاري الزواج سمعت انه جاري البحث عن عروسه هاليومين..."
بدريه : "مسرع توصلك الاخبار من قال لك..."



عبد الله :" من غيرها نظر عين ابوها رهوفه عطتني البارح وانتي في المطبخ الموجز والاخبار بالتفصيل .."
بدريه :" ثرثاره ما ادري على منو طالعه...المهم مثل ما وصلك خالد وافق يتزوج ... وامي وخواتي شايلين يدهم من الموضوع....ووكلوا لي هالمهمه الصعبه"
عبد الله :" هههههه صايره خطابه..."

بدريه : "اي خطابه الله يهديك...تصدق مسؤليه كبيره بالذات ان قلب خالد لازل متعلق في عبير وما وافق الا عشان خاطر ابوي ...واخاف اظلم بنت الناس معاه...."
قطعت كلامها لما شافت رهف داخله .....قامت رايحه المطبخ..
بدريه : "رهف نادي اختك للغدا..."
رهف وهي متجهه لابوها :"تقول لاتنادوني مالي نفس ..."


استغربت بدريه لانها لاحظت ان امل من اول ما دخلت وجهها معتفس ...ومبين انها متكدره...
وهي تكلم زوجها: "انا طالعه لامل ..."
عبد الله :"انا ما دام معي رهف ما اسال عن احد ..."
بدريه : "خلها تنفعك دلوعتك ..."
رهف : "يمه لايكون تغارين ...."
بدريه: "هههههههه الحمد لله وليش اغار ...."
رهف:"ماادري بس احساسي يقولي......"



بدريه وهي طالعه:"مو دايم يكون احساسك صادق..."

فتحت الباب وتفاجأت لما شافتهاعلى السرير وبمريول المدرسه ودافنه راسها في المخده ...
امل : "رهف قلت لك ماابي غدا..."
بدريه : "امل اشفيك ...تعبانه يمه .."


رفعت راسها لما شافت امها : "لا يمه انا بخير ..."
بدريه :" اجل اشفيك ... ابوك توه واصل من السفر البارح المفروض اول يوم يتغدى معانا فيه نكون مجتمعين"
امل :"يمه والله مالي خاطر في شي ..."
جلست على السرير وحطت يدها على كتفها :" انتي اكيد فيك شي اذا ما قلتي لامك لمن تقولين ..."
ولانها ماتخبي عن امها اي شي خبرتها بكل اللي صار لبسمه ....
بدريه :" الله على الظااالم اللي ما يخاف ربه في هاليتيمه ..."
امل :" مسكينه يمه والله تقطع القلب...."



بدريه:"ومتى يرد هالشايب من السفر..."
امل:"بعد شهر....ان شاء الله مايرد..."
بدريه:"حرام عليك ياامل تدعين عليه اكيد له اهل يحبونه..."
امل:"هو لو فيه خير ماخطب بنت في عمر بناته"
بدريه:"ياامل الحياه قاسيه وفيه ناس عايشين بس يدورون اللي يريحهم وما يهتمون في غيرهم..."
امل :"مااتخيل بسمه تقضي بقية عمرها مع رجال كبر ابوها احس هالشي ممكن يقضي عليها"


بدريه:"حتى انا مااتخيلها...."
امل:"انتي يمه لو شفتيها اليوم كان تقطع قلبك عليها..."
بدريه تتنهد:"ياليت في يدنا شي نقدر..."
سكتت لانه طرى على بالها فكره ممكن تنقذ بسمه بس تنفيذ هالفكره في مغامره كبيره ممكن بدل ماتنقذ بسمه تضيعها...




%%%%%%%%%%%%%%%%%


وهو في الشركه ويفكر في اللي صار ويقول اكيد انا استعجلت المفروض ما وافقت
بس لما فكر في السعاده اللي شافها في عيون ابوه حس انه ما غلط في قراره...
تنبه على دقت الجوال كان من رقم غريب...
خالد: الو ...
......... -
خالد بضيق : الووووووووو
-بصوت متردد:"خالد" ...
خالد وهويفكر في الصوت:" معك خالد "..


"-ما عرفتني ياخالد "
خالد بعد تفكير رد وهو متفاجاء لانه اول مره تتجراء تكلمه بعد فسخ الخطبه :"عبيييييييير"
عبير : "ايه عبير ياخالد اشلونك ..."
خالد وهو حاس انه لازم ينهي المكالمه رغم فرحته بسماع صوتها: "خير عبير فيه شي .."
عبير بحزن: "صدق ياخالد انك بتخطب ..."
خالد : "ايه بخطب عندك ماااانع ..."
عبير : "ليه ياخالد ...انا خطوبتي ..."



خالد مقاطعا : "شئ ما يهمني ...وبعدين انسي هالرقم .."
ماعطاها مجااال ترد وسكر التلفون في وجهها ....

%%%%%%%%%%%%%%%%%%

-مبروك مدااام انتي حامل..
انصدمت وهي تسمع الممرضه وجلست على الكرسي.....يالله انا ناقصني الحمل الحين...حست بيد حانيه على كتفها....
-"العنود اشفيك يمه اكلمك ماتردين..."
العنودوهي تصيح:"ما سمعتي يمه اش قالت الممرضه..."



ام فيصل:"سمعتها يابنيتي....والحمد لله اللي يجي من الله زين...."
العنود:"كنت شياله هم نايف ونواف والحين ادري ان فيه واحد ثالث في الطريق..."
ام فيصل:"اللي بيعيشهم بيعيشه وانا امك..."
العنود:"صعب يمه يعيشون بعاد عن ابوهم....."


ام فيصل:ا"بوهم الله يسامحه"
العنود في خاطرها الله يسامحك يامحمد عقب كل السنين اللي عشتهم معك ضيعت نفسك وضيعتنا معاك...

اللهم لك الحمد كما ينبغي لجلال وجهك وعظيم سلطانك



ما شاء الله تبارك الله
اللهم صل وسلم وبارك على سيدنا محمد
الصورة الرمزية بنوته مدينيه
05-27-2009, 12:01 مساءً
اشرايك صح اللي ناويه اسويه ولا غلط...
عبد الله : "والله يابدريه ما ادري ....بس انتي موقفك صعب ....اخاف بدل ما تكحلينها تعمينها للأثنين..."
بدريه :" ياعبد الله بالنسبه لخالد عندي مطلق الحريه للاختيار وصدقني لو ما قلبه مشغول مستحيل كان يلاقي احسن من بسمه وابوي مستحيل يخطب عبيرلخالد مره ثانيه....اما بسمه ياتتزوج هالشايب اللي جابه لها عمها او خالد اللي بيكون مناسب لها من كل النواحي الا الحب الاول اللي مع الايام يقدر ينساه....وبعدين في خالد ميزه ثانيه
ان عمها مستحيل يرفضه ..".



عبد الله:"بس لا تنسين يابدريه ان بسمه من عايله بسيطه ويمكن هالشي يفرق مع اهلك.."
بدريه:"اهلي وخصوصا ابوي اهم شي تكون من اصل طيب..."
عبد الله:"فيه مشكله ثانيه البنت اكيد منكسره واتوقع تكون شخصيتها ضعيفه واخوك الافضل له وحده لها شخصيتها و..."
قاطعته بدريه وهي تفكر:"تصدق بسمه على رغم حياتها لما اشوفها في المدرسه وفي حفلة نهاية السنه استغرب كان الكل يعجب بقوة شخصيتها وحسن القائها بنت محبوبه من الجميع..."
عبد الله:"موغريبه تكون كذا وانتي ادرى بحياتها عند عمها.."


بدريه: "بس لا تنسى انها عاشت في بيت ابوها الله يرحمه حياه كريمه ويمكن هذا اللي معطيها القوه اللي تظهر بها احيانا"
عبد الله:"بس ماتخافين اخوك يحطم هالقوه الباقيه عندها.."
بدريه:"وهذا اللي مخليني متردده"
عبد الله : "انا اقول اذا كنتي واثقه من اخوك ماراح يرفض ...شاوري البنت وشوفي ردها..."
بدريه وهي تفكر :" لازم ادور طريقه اخليها تجي بيتنا حتى اشاورها...."



عبد الله:"بس لا تخبين أي شي خصوصا انه كان خاطب ..."

******************************



ام عبد العزيز وهي تكلم زوجها :"اليوم بنروح العصر بيت ابو مازن بيجون اهلها وعزمتنا ..."
ابو عبد العزيزبعد اهتمام : "الباب يفوت جمل ..."
هند : "يمه كلنا بنروح ..."
ام عبد العزيز : "لان بدريه مأكده علي تجون"
هند : "بس بسمه خليها تنثبر يمه في البيت ..."



ام عبد العزيز بحزم :"لا بتروح ...اش بيقولون اذا تركنها في البيت ...."
ام عبد العزيز يهمها كلام الناس وتحب تظهر قدامهم انها حنونه على بسمه ...


%%%%%%%%%%%%%%%%%%%




-"اقول صدق الاخبار الحلوه اللي سمعناها ..."
خالد بضيق : "لا تقول الخطوبه.... هم ما صدقوا قلت ايه..... ونشروا الاخبار تصدق انت الثاني اللي تسألني اليوم .."
فهد :"من الاول اللي سألك ..."
خالد بارتباك: "واحد من الشباب ...بس انت من قال لك ؟؟"
فهد : "اللي يسمعك يقول اني غريب ما كني ولد عمك ...بعدين اذا انت ماقلت لي اخبارك لازم انا ادورها من مصادر موثوقه بس اللي ما عرفته تعيسة الحظ اقصد سعيدة الحظ من تكون؟"




خالد :"تعيسه في
فهد : "ما قلت من المزيونه .."
خالد :" اقول احترم نفسك لا تقعد تتغزل في حرمتي اللي ما ادري للحين من هي ..."
فهد : "ههههه ايه اكيد قاعدين يدورن لك عروسه بمواصفات خاااصه .."



خالد : "أي مواصفات خاصه ...عقبها ما احد يملى العين ..."
فهد :"اقول خل عنك الحب الاول وخرابيطه وعيش حياتك ..."
خالد : "وانت يالحبيب متى بتعيش حياتك ..."
فهد وهو سرحان : "قريب ان شاء الله...خالد بغيت اقول لك شي بس متردد..."
خالد:"وليش تتردد من متى هالادب ما شاء الله"
فهد:"بصراحه العنود متلومه فيك وتقول اكيد اهي السبب في كل اللي صار..."




خالد:"لا العنود مالها دخل وبعدين ابو محمد هو اللي فسخ الخطبه وابوي زعل وتعرف الوالد اذا زعل..."
فهد:"يااخي ما تدري يمكن في الامر خيره..."
خالد:" يمكن....الا اشلونها العنود عقب ما طلقها محمد..."
فهد يتنهد:" حالتها حاله...سبحان الله عقب سنين من الحب والعشره الطيبه يتغير عليها..."
خالد:"تصدق حتى انا احس محمد له فتره متغير بس ماادري اش السبب..."



فهد هو ولد عم خالد الكبير (عبد الرحمن ) عياله هم فيصل 38سنه متزوج
العنود 34سنه واخيرا فهد عمره 28سنه
فهد يعتبر هو صديق خالد الروح بالروح واقرب عيال عمه له...



%%%%%%%%%%%%%%%%%%%%


كانوا قاعدين في بيت بدريه الحريم سوااالف وضحك والبنات الجو متكهرب بينهم ...
بسبب الغرور اللي في ريم اللي تحس انه قاعده مع ناس مو من مستواها....
اما امل وبسمه كانوا منبسطين مع بعض رغم الحزن اللي تحاول تخفيه بسمه في قلبها...
ام عبد العزيز : "كيف الجامعه معك ياريم ..."


ريم بعدم اهتمام : "ماشي الحال ....يالله ملل في بيتك يابدريه ...لو مجتمعين في بيتنا ماكان حسيت بملل...."
بسمه : "لو كان في بيتكم ماكان شفناكم ..."
ريم :" وهذ هو المطلوب...."
استحت بسمه ونزلت راسها... بنات عمه انبسطوا على رد ريم ..انقهرت امل من خالتها : "والله احنا ما تحلى لنا القعده الا في بيتنا ( وهي تنا ظربسمه ) ولا تحلى الا مع حبايبنا"
رهف :" وبعدين لو سمحتي لا تغلطين على بسمه "


بسمه حبت تلطف الجو: "اشلونك مع التؤم ياساره"
ساره :"متعبين (وهي تبتسم ) بس يازينه من تعب"
بسمه :"ياحلوهم ...بالذات ريناد تجنن اموت فيها "
ساره : "ايه اكيد طالعه قمر على امها"
ريم : "الا قولي طالعه على خالتها ريم "

ام خالد :" اشلون سحر ياام عبد العزيز ماجاتكم قريب من جده "
ام عبد العزيز : "طيبه الله يسلمك بتجي عقب الامتحانات"
ام خالد : "ايه هانت مابقى الاشهرين ...سلمي عليها اذا اتصلت "
ام عبد العزيز : "الله يسلمك"



بدريه :"عن اذنكم يمه انتي وام عبد العزيزانا بروح المطبخ ...(التفتت على البنات) ...احد يقوم يساعدني .."
ما حبت تحدد احد وتمنت اللي في بالها يصير ..
بسمه (وهي قايمه )"انا بروح معك .."
رهف : "حتى انا يمه بساعدك"
بدريه : "انتي اطلعي شوفي اخوك محمد اذا صحى من النوم ...بدلي ملابسه ونزليه ..."
رهف بضيق :" ان شاء الله يمه .."


بعد ما طلعوا من الصاله مسكت يد بسمه ودخلتها غرفة المكتب وسكرت البااااب....


%%%%%%%%%%%%%%



-"تدرين اليوم انك بغيتي تفضحيني قدام ريم ..."
مشاعل : "عاد انتي ليش تخبين عنها .."
عبير :" يعنى ما تدرين ...هذي لو درت اكيد بتقول لاخوها ....ولو درى خالد ا نسي انه يفكر يتزوجني في يوم من الايام..."
مشاعل : "للحين ما فقدتي الامل..."
عبير : "ولا بفقده ...حتى لوخطب ...ما رح يتزوج الا انا ... عشان كذا كوني حذره قدام ريم ..."
مشاعل:"طيب واللي يخلي ريم تكلم شباب"


عبير:"مستحييييييل"
مشاعل :"وليش مستحيل.."
عبير:"احنا صحيح بنات خالات بس حياتي غير عن حياتها..."
مشاعل:"مشاء الله شرح وافي عزيزتي..... فهمت الحين.."
عبير:"هههههه يعني انا عادي اطلع متى مابغيت اكلم ولا احد يسأل من تكلمين بس هي مستحيل تطلع الامع امها او خالد او وحده من خواتها..."
مشاعل:"مالت عليك وتبغين تتركين هالحريه وتتزوجين واحد متشدد..."
عبير:"ياحبيبتي بيدي اخليه يتغير"
مشاعل:"مشكله الثقه الزايده...الحين خليه يرجع يخطبك مره ثانيه وعقب غيريه على كيفك..."



عبير:"بيخطبني مره ثانيه وبيكون لي ومستحيل اخلي وحد ثانيه تتهنى فيه(وهي تتنهد)...بس تصدقين اليوم كلمته وما عطاني وجه"
مشاعل:"معقووووله"
عبير:"بس اعرف خالد من متى يحبني ولا كلمني الا يوم ماخطبني مسوي فيها شريف وما يرضى علي الا مايرضاه على خواته"
مشاعل :"طلعنا عن موضوعنا المهم طيب واللي يخلي ريم تكلم شباب..."



عبير : "ياشيخه روحي ...هالشي مستحيل يصير"
...مشاعل وهي تفكر :" صدقيني مو مستحيل والايام بيننا ..."


%%%%%%%%%%%%%%%




-"وهذا هو الموضوع اللي بغيت اعرف رايك فيه ...."
بسمه وهي متفاجأه: "والله ما ادري بس انتي علشان تنقذيني من هالشايب... تعرضين علي الزواج من اخوك..."
بدريه: "يابسمه انا ماراح الاقي احسن منك زوجه لاخوي وبعدين انا فهمتك وضعه كيف....هو كان خاطب بنت خالتي بس زواجه منها صار مستحيل.."
بسمه:"اكيد هو قلبه لازال متعلق فيها..."



بدريه:"انا مااقدر اكذب عليك واقول لا...بس خالد بتزوج سواء كنتي انتي اوغيرك وصدقيني مستحيل احصل لخالد احسن منك..."
بسمه:"خايفه يابدريه بموافقتي اظلمه معي..."
بدريه:"مااقدر ااثر على قرارك بس تأكدي ان خالد ماوافق الا لما صار عنده قبول لفكرة الزواج "
بسمه:"طيب بنت خالتك اللي تحبه احس حراااام يصير فيها كذا"
بدريه:"عبير بنت ماتفكر الافي نفسها وحبها لخالد لانه الافضل ولوكان لقت افضل من منه كان بسهوله تخلت عنه"


بسمه:" ما ادري احس اني في دوامه ماني قادره افكر..."
بدريه:"خذي وقتك....انا مااطلب ردك الحين انتي استخيري ربك واللي مرتاحه عليه سويه ولما توصلين لقرار قولي لي وصدقيني غلاك ما راح ينقص لوكان جوابك الرفض...."
وهي سرحانه: "ان شاء الله يصير خير ..."

اللهم لك الحمد كما ينبغي لجلال وجهك وعظيم سلطانك



ما شاء الله تبارك الله
اللهم صل وسلم وبارك على سيدنا محمد
الصورة الرمزية بنوته مدينيه
05-27-2009, 12:04 مساءً
بعد ما طلعت ام عبد العزيز وبناتها وبسمه ...
التفتت ام خالد لبتنها:"انتي متى بتتركين هالغرور والتكبر عنك ..."

ريم: "انا ما سويت شي عاملتهم عادي وبعدين انا ما احبهم ليش انافقهم ..."
ساره: "مو نفاق انك تعاملين الناس بادب واحترام حتى لو ما حبيتهم..."
ريم: "ما اقدر وبالذات هالبسمه اللي ماحبيتها ما ادري ليش ..."
امل: "اكيد غيرانه لانها احلى منك..."
ريم: "ما عنك ذوق ياعزيزتي اذا بسمه احلى مني ..."

رهف: "انا احبك ياخالتي بس حبي لك ما يمنع اقولك الحقيقه المره...بسمه احلى منك بكثير...."
ساره: "ههههههههههه تستاهلين لا تسبين بسمه في هالبيت ولا بيطلعونك برى .."
بدريه:"انتي يمه اشرايك في بسمه"
ام خالد:"ماشاء الله عليه بنت تنحب..."


ارتاحت بدريه لما سمعت رد امها ...


%%%%%%%%%%%%%


قاعده في غرفتها....بعد ما صلت ركعتين الاستخاره...وتتحسب على عمها اللي حطها في هالموقف الصعب اليوم .مر اسبوع بعد ماكلمتها بدريه وهي مهي قادره تتخذ قرار
كان خالد مناسب لها لو ماكانت تعرف انه خاطب قبلها وفسخ الخطبه صار غصب عنه.
تنبهت على صوت عمها يناديها بصوت عالي ...


راحت تركض وهي في خاطرها الله يستر ...
ابو عبد العزيز : "ساعه لين تردين ..."
بسمه:" ما سمعتك عمي ...تآمر شي..."
ابو عبد العزيز : "اليوم عندي ضيوف على العشاء ...ادخلي المطبخ وساعدي الشغاله ابغى عشاء يبيض الوجه..."
وهو طالع: "سامعه ......."


%%%%%%%%%%%%%%%%%%


هي اقرب اخونها لها كان يناظرها ويشوف الارهاق والتعب مبين في وجهها والدموع في عيونهابعد مادرت بحملها......
فهد:"العنود الله يهديك هذا شي من ربك وحرام تعترضين"
العنودوهي تتنهد من الاعماق :"استغفر الله...بس لا تلومني ياخوي..."




حط يده على كتفها:"ما الومك بس ترى الصبر يمدحونه..."
مسحت العنود دموعها :"فهد بغيت اسألك سؤال بس متردده..."
فهد:"ادري وش سؤالك....سألت عنه ومااحد يدري وينه...."
العنود:"الله لا يحرمني منك مااحد يفهمني غيرك.."
فهد:"ايه هذا انا الله يسلمك ذكي بالفطره"
العنود:"ذكي بالفطره...واللي كان ياخذ السنه بسنتين..."
فهد:"لازم يعني من الاحراااااج وبعدين انا كنت اخذ خبره في الدراسه..."
العنود:"هههههه "


%%%%%%%%%%%%%%%%%%%


وهي في المطبخ وتحاول قدر الامكان يكون كل شئ تمام ....ومن الاستعجال حطت ابريق الشاهي على رف المطبخ اللي كان مزحوم اغراض ....ومال الابريق بيطيح حاولت تمنع سقوطه بيدها بس لما حست يدها احترقت ما قدرت تتحمل فكت الشاهي وطاح على الارض ...


كان عمها جاي ياخذ الشاهي لما سمع الصوت ...
شافها وهي جالسه وماسكه يدها وتبكي ....مسكها من شعرها وجرها بقسوه الين وقفت على رجلينها ....
ابو عبد العزيز : "انتي اش سويتي ..."
بسمه ودموعها في عينها : "عمي طاح الشاهي على الارض واحترقت يدي ..."
ابو عبد العزيز :" ليتك كلك احترقتي ..."


وعطاها كف على وجهها من قوته طلع دم من طرف فمها ...
ابو عبد العزيز وهو طالع: "كملي شغلك ... ولا تطلعين الين تخلصين ..."
نست الالم اللي في يدها والم الكف لان الالم اللي في قلبها غطى على كل الم ...
الشغاله والشفقه ظاهره في عيونها : "بسمه انتا في تأبان روووه ارتاه ..."


ما قدرت ترد عليها الا بهزه من راسها وقالت في خاطرها انتي رحمتيني وعمي اللي من لحمي ودمي مااشوف منه الا كل قسوه...."
وراحت تكمل شغلها ....عقب العشاء ما طلعت الين خلص كل شي ...
اول ما طلعت كان الهدوء مخيم على البيت لان الجميع فوق ......
وطاح نظرها على التلفون ....اللي كانت تدوره ....دقت الرقم ويدها ترتجف ...وما اهتمت اذا الوقت متأخر ...
- "الو......."



ارتاحت اول ما سمعت صوتها ....
بسمه :"هلا بدريه...." كانت تنتظرها في المدرسه على احر من الجمر ...تفاجأت يوم شافت يدها ملفوفه ...
امل : "سلامات عسى ماشر..."
سكتت لما قربت منها انتبهت للاحمرار اللي على خدها اليسار..
حطت يدها على وجه بسمه ولفته علشان تشوف خدها بوضوح ...
بسمه بسخريه : "طحت كالعاده ..."



امل :"حسبي الله عليه الظالم اللي ما يخاف ربه ...........عشان كذا اتصلتي البارح صح ..."
بسمه :"لا ....انا استخرت ...وبعدين اللي صار كمل الناقص ..."
امل وهي تمسك يدها : "هذي حياه طول العمر لازم تكون الموافقه بأقتناع ..."
بسمه: "اذا ما وافقت على خالك بتزوج غيره من غير ما يسألوني حتى رايي ...


(وهي تبتسم بمراره)وبعدين انتي ما تبيني اصير مرة خالك ...."
امل : "اكيد ابيك تصيرين ...."
بسمه:"خلاص لا تخليني اهون..."
امل:"لا... حرااام عليك تهونين..."



بسمه وهي تفكر:" تتوقعين عمي يوافق...."
امل:" اكيد بيوافق...."
بسمه:"واش اللي يخليك متاكده كذا..."
امل:"لان عمك... واسمحي لي على هالكلمه...طمااااااع وزواجك من خالي فرصه مستحيل تتكرر مره ثانيه..."
بسمه:"عمي مااحد يقدر يتوقع ردود افعاله..."
امل:"لا ان شاء الله يوافق..."


بسمه:"تدرين ليش وافقت..."
امل:"ههههه لانك حبيتي خالي اللي عمرك ماشفتيه..."
بسمه تبتسم بمراره:"لا مهو هذا السبب ...انا زي الغريق والامواج تلعبي...وحلصت واحد يسبح بجنبي اقدر اتعلق فيه وممكن ينقذني....بس اخاف اغرق واغرقه معاي..."
امل:"لا تخافين خالي سباح مااااهر..."
بسمه:"ههههه فضيعه انتي اشلون تحولين الجد للهزل ماادري..."
امل:"هذا سر المهنه....مااقدر اعلمك كيف..."
بسمه:"مشكووووره ماابغى اعرف كيف..."
سمعوا الجرس وتجهزوا بيدخلون الفتت على صديقتها ...


امل : "صدقيني ماراح تندمين على هالقرار ..."
بسمه: "ان شاء الله ......."
وهي في خاطرها عساني ما استعجلت وغلطت غلطت عمري....


%%%%%%%%%%%%%%%%%%%%%%%

كانت قاعده مع اهلها في الصاله وعقلها مو معاها...
فهد:"اكلمك وين رحتي."



العنود:"ها...ما سمعتك..."
فيصل: "بعذرها ماتسمع وهي اللي شافته من هالحيوان شويه.."
حز في خاطرها انه يسب محمد...وانتبه فهد لها وضايقه كلام فيصل...
فهد:"يااخي لا تنسى ان عياله ممكن يدخلون في أي وقت..فماله داعي يسمعون هالكلام..."
فيصل:"خلهم يعرفون ابوهم على حقيقته..."
فهد:"تراه ابوهم مهما صار..."
فيصل:"ياليتني اشوفه النذل..."



فهد:"يااخي ما عليك منه...."
فيصل بعصبيه :"اشلون ما علي منه اهان اختي وتقول ماعلي منه..."
ماقدرت العنود تسمع اكثر من كذا وقامت غرفتها...
فهد:"ارتحت الحين نكدت عليها..."
فيصل:"انا ما قلت شي غلط..."
ابو فيصل واللي كان طول الوقت ساكت:"الا قلت اشياء غلط موشي واحد..."
فيصل:"بس يبه..."


ابو فيصل:"انا كنت ساكت احتري تسكت من نفسك.. "
فيصل:"اعتقد عقب اللي سواه ما ظني تهتم فيه.."
ابو فيصل:"شوف انت وياه من اليوم ورايح محمد مايجي طاريه في هالبيت لابالخير ولا بالشر هوصفحه وانطوت من حياتنا...."
ابو فيصل اكبر اخوانه....وكان الكل مايرد كلامه ...رجل حكيم وقليل كلام لكن اذا تكلم وقال رايه الكل يسمع لانه غالبا رايه هو الصح...


************************************



في الليل وعقب ما اكدت لها امل موافقة بسمه ....اتصلت في خالد ...
خالد : "هلا وغلا ...باحلى بدريه ..."
بدريه : "ههههههههههه هلا خلودي ..."
خالد :"أي خلودي هذا الظاهر اختي غلطانه في الرقم ..."
بدريه :" ههههههههه اسفه قصدي خالد ....وينك الحين انت ...."
خالد : "في ارض الله الواسعه ...ليه بغيتي شي ..."


بدريه :"ايه ...ابوي عندي ونبيك تمرنا ...."
خالد : "ابوي عندك ...الله يكافينا شر مؤمراتكم ...اوكيه ربع ساعه وانا عندكم ..."
بدريه : "ننتظرك ..."
اول ماسكرت التفتت لابوها : "يقول ربع ساعه وهو عندنا ..."
ابو خالد وهو يفكر : "انتي لما بلغتيني عن موافقة البنت حبيت اكلمه في بيتك وما ابي امك تدري الاعقب ماينتهي الموضوع لان امك اذا درت اكيد خالتك بتدري وانا ماابيهم يدرون الحين ..."



بدريه : "واذا دروا..."
ابو خالد:"انا بقولك كلام مااقدر اقوله لغيرك.."
بدريه:"تفضل يبه..."
ابوخالد: "انا من اول ماابغى خالد يتزوج عبير والمره الاولى خطبتها له عشان خاطره....
بدريه:غريبه يبه ليش ماتبيه يتزوجها..."
ابو خالد:"ماادري ليش يمكن لاني اخاف اخسر ولدي بسبتها..."
بدريه:"ما فهمت يبه"
ابو خالد:"يعني عبير بنت دلوعه واخوك مجنون بحبها من الحين اشلون عقب..."
بدريه:"هههههه طيب اش يدريك يمكن حتى بسمه يصير مجنون بحبها..."



ابو خالد:"شفتي ما فهمتيني..."
بدريه:"اللي فهمته واعذرني على هالكلمه كانك تغار على خالد..."
ابوخالد:"تصدقين ندمت اني قلت لك..."
بدريه:"ههههه ليه يبه..."
ابو خالد:'ماادري اشلون افهمك.."
بدريه:"ماعليه حاول يبه..."
ابو خالد:'انا يابنتي ماعندي اعتراض ان خالد يحب اللي بتكون زوجته ولو غيران مثل ما تقولين ماكنت اضغط عليه يتزوج...بس انا عبير بنت خالتك هي اللي معترض عليها..."
بدريه:"شفت عليها شي..."


ابو خالد:" حرااام اظلمه بس عبير نسخه مصغره عن امها....وماانسى امها اشلون فرقت بين ابو محمد واهله على ان اهله هم خوالها وهذا اللي اخاف منه...."
بدريه تبتسم بحنان لابوها:'خالد يبه غير ومستحيل في حرمه تغيره على اهله وان شاء الله تكون بسمه من نصيبه..."

%%%%%%%%%%%%%%%%%


سمعت احد يطق باب غرفتها ....استغربت لان ماحد في هالبيت يطق العاده يصارخون عليها الين تسمعهم او يفتحونه فجأه عليها ...
طلت عليها براسها ...
-"اش رايك في هالمفاجأه ..."



ضحكت وراحت تركض لبنت عمها وحظنتها بقوه ...
بسمه : "ماني مصدقه عيوني ...اشتقت لك والله ياسحر ..."
سحر : "انا اكثر اشلونك .."
بسمه : "الحمد لله... متى جيتي ..."




سحر : "توني واصله وما قلت للجميع حبيت اسويها مفاجأه..."
سكتت لما شافت يدها ووجهها ...وتنهدت :" ابوي صح .."
نزلت بسمه راسها ولا ردت :"الله يسامحه ...تكفين بسمه سامحيه هوبس عصبي شوي ..."
بسمه :" الله يسامح الجميع ...بس قالوا منتي جايه الاعقب الامتحانات..."
سحر:"هذا الله يسلمك عند ابراهيم انتداب 4شهور يعني بقعد على قلوبكم الين تملون......"
بسمه:"بالعكس انتي القعده معك ماتنمل..."

اللهم لك الحمد كما ينبغي لجلال وجهك وعظيم سلطانك



ما شاء الله تبارك الله
اللهم صل وسلم وبارك على سيدنا محمد
الصورة الرمزية بنوته مدينيه
05-27-2009, 12:06 مساءً
ها ... اشرايك في الموضوع ..."
خالد بسخريه : "خلاص انتي كلمتي البنت يعني مالي راي ..."
بدريه بعصبيه : "ليش تقول كذا انت اللي قلت لي ادورك ... وانا لما حسيت انها ممكن تطير قلت اكلمها اول واشوف .."


خالد في خاطره ليتها طارت : "اشفيك عصبتي امزح معاك ...بعدين سوي اللي تبيونه ..."
ابوخالد : "خلاص انا الحين اكلم اعمامك ونرح لعمها عقب العشاء ..."
خالد وهو متفاجأ : "اليوم يبه ..."
ابو خالد :" ايه اليوم ...خير البر عاجله ..."


خالد :"لا اشوف نأجل الموضوع شوي نخليه الاسبوع الجاي .."
ابو خالد : "اش الفرق بين اليوم والاسبوع الجاي ..."
خالد :" مافيه فرق بس ...."


سكت لما شاف ابوه رافع الجوال بيكلم اخوانه ...ولسان حاله يقول اسكت ......
تضايق مادرى ان الموضوع بيصير بهالسرعه ...قال اكيد انه يبيلهم شهور وهم يدورون مادرى انها جاهزه....حقد على بسمه اللي طلعت في طريقه فجأه ...


%%%%%%%%%%%%%%%%%%


دخل على مرته اللي قاعه مع بناتها ..
ابو عبد العزيز :لقيت ابو مازن في المسجد وقال بيمرعلي هو وعمه ابو خالد .....
ام عبد العزيز : غريبه اش سبب هالزياره ...

عبد العزيز : يبه ابو مازن جا معه رجال دخلتهم المجلس ...
استغرب ابوعبد العزيز اول ما دخل وشاف ابو مازن ومعه ابو واعمام مرته واخوها خالد ...
-حيا الله من جانا...............

$%$%$%$%$%$%$%%$%$%$%$



وهي تكلمها في التلفون ...
-"اقول ريم انا عندي مشكله واتمنى تساعديني فيها ...."
ريم :" اكيد بساعدك ...بس اش مشكلتك ...."
مشاعل : "هذا الله يسلمك سعود اللي اكلمه يحبني وانا بعد احبه وقرريخطبني بس انا خايفه انه يكلم غيري ...."
ريم :"ههههههههه انقلبت الايه بدل ماهو يتأكد انتي اللي تبين تتأكدين..."




مشاعل : "نفسي اعرف هو صادق ولا كذاب ..."
ريم : "والمطلوب ..."
مشاعل : "المطلوب ياعزيزتي ابعطيك رقمه وابيك تكلمينه و..."
ريم مقاطعه : "اسفه مااقدر ..."
مشاعل :"اخدميني هالخدمه ..."
ريم : "والله مااقدر في حياتي ماكلمت رجال غريب ..."



مشاعل : "هي مكالمه وحده بس ..."
ريم :" مااقدر ........"
مشاعل مقاطعه : "انتي فكري زين ولا تحملين الموضوع اكثر مما يستحق ..."
ريم : "خلاص ارد عليك بعدين ..."
مشاعل :" انتظر ردك ..."


%%%%%%%%%%%%%%%%%


كان فرحان من اللي قاعد يسمعه الحين وتمنى ان اللي يخطبونها هي وحده من بناته
وانصدم لما درى انهم يخطبون بسمه وحاول يداري صدمته ومايبينها لهم....
كان المتكلم هو ابو فيصل بحكم انه هو الكبير ....




ابو فيصل : "وانت شاور اهلك ورد علينا ...."
ابو عبد العزيز : "انا ماعندي مانع ....وبشاور الاهل وانشاء الله مايصير الا كل خير..."
ابو خالد : "ننتظر ردك يابو عبد العزيز بس لا تطول ..."
كان خالد انه في عالم ثاني وندم انه وافق ما توقع كل شي يصير بهالسرعه ....


*********************

كانت بسمه في الصاله مع مرة عمها وبناتها كانوا يسولفون وهي عقلها مو معها ...
لانها عارفه ليش ابوخالد جاي عندهم ..انتبهت على دخلت عمها ...كانت ملامحه غامضه ...اول مادخل ناظر بسمه بنظرات غريبه
ام عبد العزيز : "اش عندهم اللي كانوا موجودين عندك ..."
ابو عبدالعزيز :" جايين يخطبون ..."
فرحت ام عبد العزيز وبناتها لكن اصدموا يوم سمعوا ابوعبد العزيز يكمل كلامه
ابو عبد العزيز : "يخطبون بسمه لولدهم خالد ..."
ام عبد العزيز بعصبيه : "ما قلت لهم انها مخطوبه ..."
ابو عبد العزيز:" مستحيل اقول كذا ...هذا نسب ماينرد ..."



هدي : "وخطيبها الاولي ..."
ابو عبد العزيز :"ما علي منه وبعدين ماصار شي رسمي بيننا ..."
ابو عبد العزيز :" ها ...بسمه اشرايك .."
بسمه :" اللي تشوفه عمي انا موافقه ..."
ابو عبد العزيز : "جاك يابسمه اللي مااقدر ارده مثل مارديت غيره ..."
سحر الوحيده اللي فرحت لبسمه ...
سحر : "مبروك يابسمه ..."
ابو عبد العزيز:"للحين ماصار شي عشان تباركين..."
سكتت لما شافت نظرات اهلها لها...........



*******************

ماصدقت تروح امل عند ابلة الكيمياء تسألها شوية اسأله....كانت تبغى تتكلم مع دلال اللي بتاخذ معها راحتها اكثر....
بسمه:"تصدقين يادلال حتى النوم ما اتهنى فيه"
دلال:"وليه.... يابعد عمري"


بسمه:"من كثر ماافكر...."
دلال:"وكلي امرك للكريم....وان شاء الله القرار اللي اتخذتيه هو الصح"
بسمه:"ياخوفي يادلال اكون تسرعت"
دلال:"لا ان شاء الله ....كوني متفأله...وبعدين انتي حسبتيها في عقلك وشفتي ان خالد هو الافضل"

بسمه:"اخاف اني ماحسبتها صح"
دلال:"بسمه اشفيك...ليش كل هالخوف"


بسمه:"ماادري قلبي مقبوض"
دلال:"اكيد بيكون مقبوض اذا هذا هو تفكيرك"
بسمه:"اش اسوي غصبا علي"
دلال:"تدرين...روحي لعمك وقولي ماابغى خالد زوجني الشايب اللي جبته لي"
بسمه وهي تبتسم بمراره:"كان يموتني لو قلت كذا....انا ما يحق لي الاختيار بينهم هو الوحيد اللي يحق له حق الاختيار"
دلال:"المفروض هالشي يخفف عنك اللي تسوينه في نفسك لانك مااخترتي..."




بسمه:"بس ياحلوه....خالد لو ما وافقت ماخطب من الاساس"
دلال:"ترى زهقت منك اجيك يمين تجين شمال.... واجيك شمال تجين يمين..."
بسمه:"انا يادلال لما اتكلم معاك كاني اكلم نفسي بصوت مسموع"
دلال:"الله يعين نفسك عليك اذا دايم كذا"
بسمه:"لا ماكنت كذا بس من جوا هالخطاب اللي كل واحد انحس من الثاني"
دلال:"حرااام عليك لا تقارنين بينهم"
بسمه:"صحيح مافيه مقارنه بس..."
قاطعتها دلال:"بس شو انتي ووجهك..."

بسمه:" نسيتي لما كانت امل تحكي عن خالد وقصة حبه لبنت خالته"
دلال:"ما نسيت بس تاكدي انه ماوافق يخطب الا وعنده استعداد يبدأ حياة جديده"
بسمه:"ياليت الامور بهالسهوله"
دلال:"وبعدين تعالي الحين عمك خلاص وافق على خالد"
بسمه:"حسب معلوماتي البسيطه...لا"



دلال وهي تشدها من اذنها:"للحين يالظالمه ومسويه لي هالازعاج كله"
بسمه:"ههههههه شفتي انا ماقلت لك اني اعتبرك نفسي"


%%%%%%%%%%%%%%%%


ما صدق عيونه لما شافه واقف عند مكتب ابوه اتجه له والشرريطلع من عيونه...
فيصل:"لك وجه تجي عقب كل اللي سويته"

محمد " يافيصل انا...:"
فيصل:"انت نذل و..."
محمد:"ياخي انا جاي اقابل الوالد..."
فيصل:"اطلع برى لاارتكب فيك جريمه"
محمد:"يااخي عطني فرصه اتكلم"
فيصل:"ولك وجه تتكلم بعد"
محمد:"يا... "
فيصل:"اطلع برى.."



ابو فيصل:"فييييييصل"
انتبه فيصل على ابوه اللي الظاهر سمع كل شي من مكتبه"
فيصل:"هلا يبه ....شفت"
قاطعه ابوه"ايه شفت كل شي ولو سمعت رح مكتبك الحين"
طلع فيصل وهو معصب من تدخل ابوه اللي ماجا في صالحه...
وقف محمد قدام عمه وهو مستحي منه دايم كان يحترم عمه لان اللي صار خلى ماله وجه يتطلع بعمه...
محمد:"بغيت ياعم ابو فيصل اكلمك في موضوع"



ابو فيصل:"لو جيتني في البيت مهو احسن"
محمد:"بغيت اكلمك على انفراد وحسيت انه في مكتبك بناخذ راحتنا اكثر"
ابو فيصل:"طيب تفضل يامحمد في المكتب حياك..."
استحى محمد زود من سعة صدر الرجل وقدرته على التحكم في اعصابه....برغم كل اللي صار...


%%%%%%%%%%%%


قاعد هو ومرته وسحر في الصاله بعد ماطلعوا عيالهم لمدارسهم....
ابو عبد العزيز:"صعب اللي تقولينه ياام عبد العزيز"
ام عبد العزيز:"وليش صعب....قول مخطوبه..."
ابو عبد العزيز:"تحسين هذا نسب ينرد"
ام عبد العزيز:"ايه وانت ياحظي اش بتحصل من هالنسب من تتزوج بسمه حتى والله ماتطل عليك من هالباب"
ابو عبد العزيز:"تتوقعين كذا..."
ام عبد العزيز:"اكيد..."



سحر:"بس حرام عليكم تضيعون مستقبلها مع واحد كبر ابوها"
ابو عبد العزيز:"ومن قالك بيضيع مستقبلها وبعدين الرجال مايعيبه عمره"
حست ان اسلوب الاستعطاف ماراح ينفع مع اهلها ولازم تكلمهم بعقليتهم"
سحر:"صدقوني بسمه ماراح تنسى اهلها"
ام عبد العزيز:"من زين معاملتنا "
قالت في خاطرها حسنوا معاملتكم لها مادامكم دارين...
سحر:"طيب يبه لو مااستفدت منهم ماديا ...اكيد بتستفيد معنويا"
بان الاهتمام على وجه ابوها:"اشلون"



سحر:"انت تشتغل في العقار...ولما ينتشر في السوق ان عايلة خالد بغناها ونفوذها ناسبتك هالشي بيقوي اسمك في السوق..."
ابو عبد العزيز:"صدقتي هم املاكهم كثيره وممكن الواحد يحصل من وراهم كم من صفقه..."
سحر:"وحتى لو مااستفدت منهم بتستفيد من غيرهم لما يعرفون انسابك"
ام عبد العزيز:"مااتوقع تستفيد من وراهم شي.."
سحر:"وحتى يبه لو.....ما تخاف لو ترفض خالد انهم يدمرونك في السوق..."
جلس يفكر في كلام بنته وام عبد العزيز تناظر بنتها وتقول في خاطرها عرفتي كيف تقنعين ابوك ياسحر........

اللهم لك الحمد كما ينبغي لجلال وجهك وعظيم سلطانك



ما شاء الله تبارك الله
اللهم صل وسلم وبارك على سيدنا محمد

أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع


المواضيع المتشابهه
الموضوع المنتدى
ممرضه سعوديه سوت جريمه في مستشفى الملك خالد الجامعي فالرياض قبل 3 ايام للمواضيع الفكاهيه
هزمتني همسة من شفتيها .. رواية رمنسية جريئة حزينة. رواية رهيبة وخطيرة مرررة الروايات
رواية .. ضمني حبيبي لحضنك واطربني بدقات قلبك فأنا بدونك اضيع << رواية سعودية رومنسية المواضيع المكررة والمخالفه
قمر خالد ( رواية بمعنى الكلمة) الروايات
جود الحزن ...قصه سعوديه واقعيه لاتفوتكم جنان الروايات

جميع الأوقات بتوقيت GMT +3. الوقت الآن 05:01 صباحاً.