الصورة الرمزية alex w bas

طريقة ترتيب نيش السفرة

06-08-2009, 07:20 مساءً

اهلا بيكم ياعرايس المنتدي
طبعا كل عروسة بتفرش النيش بتاعها بتبقى محتارة تفرشه ازاي؟
ازاي مايبقاش تقليدي؟
انا هديلكم شوية نصايح يارب تفيدكم
بس الاول اعرف النيش لان اكيد في كتير من الاخوات مايعرفوش يعني ايه نيش
لان الاسامي بتختلف من بلد لبلد
النيش ده عبارة عن دولاب ب2 ضلفه او 4 ضلفه حسب حجمه
بيبقى الوش بتاعه زجاج والجوانب زجاج والظهر خشب
لكن فيه مرايه عشان يعكس الضوء
وده بيترص فيه طقم الصيني واطقم الشاي والقهوة والكاسات ....وهكذا
ودي صورته



نبدأ بقى طريقه فرشه بسم الله
اولا طبعا لازم تفرشي بالمفارش اللي تبع مفرش السفرة
بيكون في مفارش مربعة صغيرة بتحطيه ويكون نازل منه جزء على شكل مثلث وطبعا بيكون المثلث ده مطرز
بتفرشيه في الوش وفي الجوانب كمان عشان تدي شكل جميل
ودي صورة للتوضيح طبعا منقوله من المنتديات



ثانيا ترتيب الاطقم
حاولي وانتي بتشتري الاطقم متجبيش الوان كتير
يعني بلاش يبقى النيش عبارة عن كرنفال الوان عشان ميزغللش العين
وكمان هتلاقي صعوبه في تنسيقة خصوصا لو المفرش لونه مش لايق مع الطقم
يعني حاولي يبقى الاطقم على قد ماتقدري لون واحد او لونين بالكتير
يعني لو ذهبي يبقى الكاسات فيها خطوط او رسومات دهبي وممكن يكون طقم الشاي على لون عسلي يعني حاولي يبقى الالوان ماشيه مع بعض وطبعا المفارش تكون ذهبي فاتح او بيج
ولو عايزة تكون حاجتك على فضي يبقى دي سهله بالنسبالك ممكن تحطي لون تاني زي الاحمر او الاخضر او الازرق وده هيديكي انعكاس جميل جدا
زي النيش ده عبارة عن لونين فضي وابيض مع احمر



طريقة الترتيب بقى طبعا الكاسات واطقم الشربات بيبقوا لوحدهم وترصيهم بشكل جميل لكن بلاش تبالغي وتكتري في الحاجه عشان جمال الاطقم هتروح

وطبعا طقم الشاي بترص كله وبيكون البراد في النص وحواليه الفناجين وبيكون وراه سيرفيس مدور او بيضاوي زي ماتحبي ويكون واقف وراه يعني ساند على خلفيه النيش وممكن كمان تحطي حواليهم فناجين القوة اللي تبع طقم الصيني طبعا عشان يبقو شكل واحد

واطقم الخشاف بيكون الطبق الكبير في النص وبيتحط جواه الاطباق الصغيرة بشكل مرتب وجميل
وطبعا بيكون عندك طقم صواني للتقديم بتكون غير اللي بتستخدميها في المطبخ
ودي بتحطيها في الخلف زي السيرفيس كده اللي اتكلمت عنه من شويه

اما بالنسبه لشنطه الملاعق فليكي حريه الاختيار
ياما بتفتحيها وتحطيها زي ماهي
ياما وده الافضل انك تشيلي الملاعق منها وتضعيها في ادراج البوفيه
طبعا الملاعق بتبقى محطوطه في حاجه كده جوة الشنطه وبتكون لكل واحده مكان مخصص فانتي بتشيليها بيها عشان شكل الملاعق ميبوظش
بالنسبه بقى لباقي طقم الصيني فدول بيترصوا في البوفيه ولو ماعندكيش بوفيه فبترصيهم في النيش من تحت خالص بيكون في مكان متداري
طبعا لان ماينفعش ان الاطباق تبان في النيش

ولو عندك اي اطقم زياده من الكاسات او الشربات او قهوة والنيش اتملا خلاص
فممكن ترصيه جوة البوفيه زي مانتي عايزة
وممكن تحطي شويه اكسسوارات حوالين الاطقم لكن بلاش تكتري عشان مفيش احلي من البساطه
وده مثال للاكسسوار

وكده نبقى خلصنا كلام عن طريقه ترتيب النيش
يارب اكون أفدتكم وماحدش يقول عليا رغاية هههههههههههه

نتقابل في يوم تاني مع موضوع تاني

الصورة الرمزية alex w bas
الصورة الرمزية alex w bas

أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع


المواضيع المتشابهه
الموضوع المنتدى
طريقة ترتيب السرير مثل الفنادق (بالصور) سيدتي ديكور فن وتصميم الديكور
طريقة ترتيب علب مكياجك خطييييييييره لا تفوتكم صالون التسريحات والمكياج
حلقه مناديل السفرة بعجينه السيراميك قسم الاشغال اليدويه
تشكيلة من غرف السفرة ,, روعـــــــــة سيدتي ديكور فن وتصميم الديكور
أفخم أطقم السفرة على الأطلاق سيدتي ديكور فن وتصميم الديكور

جميع الأوقات بتوقيت GMT +3. الوقت الآن 06:23 صباحاً.