الصورة الرمزية طائرالوئام

الــــكـــــبــــــة الـــشّــــامـــيــــــة خمس انواع خطوة بخطوة وبالصور

02-03-2010, 10:13 مساءً







يسعد اوقاتكم ياأرق والطف سيدات

حيث اني عملت بحث بكوكل عن الكبة ومالقيت شرح لطريقتها بالتفصيل مع الصور حبيت اخص منتداي العزيز بهل الموضوع

و بحب اهديه لاختين العزيزتين دودو المصرية وكول كيرل

لانهم طلبوها مني

واتمنى ما ساقدمه لكم ينال استحسانكم


الكبة لها نواع كتيرة بتتجاوز 150 نوع

وهي مشهورة بمنطقة بسوريا تسمى حلب


وبالشام منعمل هل الانواع أكثر شي رح اقدملكم اياها على مدة خمس ايام

وهي الكبة المقلية طبعا الكل عارفها
والكبة المشوية
الكبة اللبنية
الكبة المبرومة
الكبة على السيخ



رح ابداااا اليوم بعجينة الكبة الخارجية وهي رح نعتمدها بكل الانواع




ملاحظة: اللحمة الهبرا هي لحمة ما فيها دهن ابدا وهي سر نجاح الكبة وعدم تفككها وخصوصا بالقلي .........لاحظو لونها بالصورة





بالنسبة للبرغل الاحسن انويكون ناعم عشان لاياخذ كتير طحن
يغسل ولا ينقع

اطحني البرغل بماكينة الكبة على انعم شفرة







اطحني بالمرة الثانية اللحمة والبرغل والبصل معا

وارجعي مرة تانية اطحنيهم عشان ينعموا منيح

وهيك رح تكون العجينة




الان بللي يديك بالماء واعجني واضيفي الملح والفلفل وفي ناس بتضيف النعنع الناشف


((ملاحظة: العجينة رح تاخد كمية من الماء لان البرغل بيشرب الماء كل ما حسيتي العجينة ناشفة وانتي بتعجني بللي يديك مرة اخرى بالماء))

وهيك بتكون العجينة جاهزة لتشكيل الكبة بانواعها


انتظروني لتقديم انواع الكبة




**هذا الموضوع خاص بي وارجو عدم نقله وان حصل ارجو ذكر المصدر**





الصورة الرمزية طائرالوئام
02-03-2010, 10:14 مساءً
الكبة المقلية








اول شي منقلي البصل بشوية زيت....


بعدين منضيف اللحمة ونقليها مظبوط وبنحطلها الملح والفلفل والبهارات وكمان حطيت جوز مفروم ممكن تستبدليه بالجوز




وخليها لتبرد مشان نحشي فيها الكبة




طريقة الحشي :

جيبي قطعة من عجينة الكبة خليها متل الكورة فرغي وسطها باصبعك وخليها رقيقة ,,,,,,,,,,,,انا بستعمل ماكينة الكبة لانها اسرع

بتكون معها قطعة خاصة للكبة المقلية ...





سكريها من تحت وحطي بداخلها اللحمة المفرومة




لملمي اطرافها .... شوي شوي وسكريها لتاخذ شكل الكبة




يمكن يطلع بالحبة تشققات .....امسحيها بقليل من النشا المذوب بالماء

كمان بيمسكها مشان ما تفرط بالقلي ..(وهاد سر من اسرار الكبة )





وهون بعد التشكيل .............وممكن تعمليها وتحطيها بالفريزة لوقت القلي



واقليها بالزيت .....





وهي الصورة من جوا لاحظو سماكتها كل ما كانت ارق كل ماكانت احلى




وهي طريقة الكبة المقلية ,,,,,,,,,,,,,بالتفصيل الممل

اذا في اي سؤال لاتترددوا

وان شالله تجربوها ...........

بانتظار ردودكم..........






يتبع

الصورة الرمزية طائرالوئام
02-03-2010, 10:15 مساءً
الكبة المشوية




اليوم حبيباتي رح اشرحلكم طريقة الكبة المشوية

وهي اكثر نوع بحبو بانواع الكبة كلها.....

لاتستغربوا من الحشوة ترى الطعم خطيرررررررررر كتير


بسم الله نبدأ





بالنسبة للحمة هي تقليها مع البصل والبهارات (كمية قليلةيعني كل كيلو دهنة وشحمة ربع كيلو لحمة)


وفي هذه الصورة الدهنة الى اليمين والشحمة على اليسار





الخلطة المشوية هيك بيكون شكلها.....ممكن تضيفيلها حب الرمان الحامض


((توضع الدهنة والشحمة نيئة))


طريقة التشكيل

ناخذ قطعة من عجين الكبة بنعملها دائرة ....بعدين نحنضعها بين طبقتين من النايلون ونضغط عليها بشكل دائري ....عشان تعطينا دائرة
بهذا الشكل



نضع عليها قليل من الحشوة


ونقوم باغلاقها بقطعة تانية

ونضغط على الاطراف لتتماسك مع بعضها




نمسح عليها بقليل من ذرات الماء ((عشان التشققات يلي بالبرغل تروح ))


طريقة الشوي تحضري قطعة حديد وتحطيها على الغاز عشان النار ما تحرق اقراص الكبة حطي فوقه الشبك وصفي الاقراص وقلبيها بهدوء الى ان تنضج



والاطيب اذا بتكون مشوية على الفحم ممممممممممممم مارح تنسوا طعمها



وهون بعد ما استوت



وهي القرص قسمتو عشان تشوفوا الحشوة كيف ناضجة وما أحلاها







شو رائيكم بهل النوع يمكن تستغربوا كثرة الدهنة بس هيك اصولها تنقط دهن
ومع انها دسمة بس رح تاكلي اكثر من 3 اقراص



لانها صغيرة هههههههههههه


ولا في ناس بتعملها ...... بيجي القرص لوحده نص كيلو هههههههههه ....................يعني وجبة وزيادة....


وصحتين وهنااااااااااا


يتبع

الصورة الرمزية طائرالوئام
02-03-2010, 10:15 مساءً
الكبة اللبنية


هاد النوع من الكبة .........ممكن يؤكل دافي اوبارد ,,,
نبدااا فيها على طول



نطبخ اللحمة مع البصل , ومنحط معها جوز او صنوبر

اذا حبيتي تحطي بهارات ممكن وطبعا ملح وفلفل


نشكل العجينة بنفس طريقة المقلية ولكن حجمها اصغر

انا عملتها وحطيتها بالفريزة ,,ممكن تحفظي الكبة المقلية ايضا وتخليها لوقت الاستعمال ,,اما اذا حبيتي تحفظي المشوية ممكن تشويها نصف شوي وتحطيها بالفريزة وبس تطلعيها تكملي شويها



طريقة طبخ اللبن

انا بستعمل لبن نادك هو احسن نوع للطبخ ......نضربه بالخلاط

بعدين نضعه على النار ونضفلوا نشاااا مذوب

ونستمر بالتحريك لغاية ما يغلي

نحضر حبات الكبة ونقوم بعمل 3ثقوب بعود الاسنان




اتركيها مدة ربع ساعة ....

في ناس بتحط للبن ثوم ونعنع .... عند اهلي بيحطو عسبة اسمها طرخون بس للاسف ما لقيتها بالسعودية


وهي الصور







تقدم مع الارز بالشعيرية.....

اتمنى تجربوهاااا ... وثقوا انكم مارح تندموا


يتبع

الصورة الرمزية طائرالوئام
02-03-2010, 10:16 مساءً
الكبة المبرومة



معليش هل المرة تاخرت لان النت انتحس وصار بطيء
رح ابدااا بالطريقة على طول




اللحمة : تقليها بالطريقة العادية مع البصل والمكسرات والبهارات يلي بتحبيها


طريقة اللف

تحضري قطعة من عجينة الكبة

تضعيها بين قطعتين من النايلون وتفرديها بالنشابة



نضع الحشوة على عرض قطعة العجين المفرودة




ثم نلفها بمساعدة النايلون ((لانها تلتصق باليد))



بعد ماتخلصي لف اضغطي عليها قليلا لكي تتماسك


وقطعيها وصفيها بالصينية



ادهنيها بالزيت وادخليها الفرن...

((طريقة الكبة بالصينية مشابهة لهذه الطريقة ...نفرد العجينة بواسطة النايلون ونضع طبقة من العجين بالصينية ثم طبقة لحمة مفرومة مقلاية ثم طبقة ثانية من العجين المفرود ونرصها قليلا لتتماسك وندخلها الفرن))


وهذا شكل الكبة المبرومة بالاخير



ان شالله تعجبكم ....تحياتي لكم



يتبع


« الموضوع السابق | الموضوع التالي »
أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع


المواضيع المتشابهه
الموضوع المنتدى
طريقة عمل السينابون خطوة بخطوة وبالصور الحلويات
قوالب محشوة بالتمر ومزينة باللوز خطوة خطوة وبالصور الحلويات
سر الكنافة العجيبة بحشوة غيييير من مطبخي وبالصور خطوة خطوة تذووووووب بالفم الحلويات
حلوة الفواكه خطوة خطوة وبالصور الحلويات
مكياج تركواز خطوة خطوة وبالصور صالون التسريحات والمكياج

جميع الأوقات بتوقيت GMT +3. الوقت الآن 09:58 صباحاً.

 اتصل بنا - أعلن لدينا - سياسة الخصوصية -