طاجين الدجاج معسل و مخضر بطريقتي و بالمراحل المصورة من مطبخي

09-18-2010, 03:47 مساءً



السلام عليكم ورحمة الله وبركاتة

[IMG]http://img690.********************.us/img690/7316/41398414.gif[/IMG]








حبيباتي هاد الطاجن للي ذاقو عندي كيسولني على الطريقة
و فعلا كيجي لذيذ و للي ذاقو كيظن انه صعب التحضير
لكن هو سهل و كيوجد فيسع لو جاوك ضياف على غفلة








انا كل مرة باش كنحضرو دجاج، كوكلي، سمان، حمام او حتى لحم او حوت
و كل مرة باش كنخضرو:
تفاح ، بعويد، اناناس، مشماش ، خوخ ، شهدية...
طري او معلب فواكه جافة حسب المتوفر

لكن طريقة الطبخ و التحضير كتبقى وحدة
ان شاء الله تعجبك و تفيدكم










[IMG]http://img683.********************.us/img683/9720/22588564.gif[/IMG]



نخليكم مع المقادير:




دجاجة (الحجم حسب عدد الاشخاص)
2 بصلات بيضين مشلضين
2 فصوص ثوم مهروس او مدقوق
1ملعقة صغيرة كامون
1ملعقة صغيرة عطرية الدجاج
نصف ملعقة صغيرة خرقوم
1 مكعب البنة زعفران
نصف ملعقة صغيرة سمن بلدي
15 حبة قاعقلا صاينة
5 حبان بسيبيسة صاينة
ملعقة وريقات نويويرة صاينين
ملح




ملعقة سكر فانيلا
2 معالق زبدة
ملعقة قرفة




للتخضير:



انا خضرة بالبعويد طري و المشماش يابس و الڭرڭاع و اللوز مهرمش

















[IMG]http://img683.********************.us/img683/2758/69288681.gif[/IMG]

الطريقة:

اولا كنغسلو الدجاجة ديالنا بالماء و الملح و الخل او الحامض و نفركوها مزيان بالملحة الغليضة باش يتحد منهاكل الشوائب و ايضا كينقصو الدهون





ثم كنشدها نقطعها لاطراف ، انا كنبغي نقطعها كل طرف بوحدو باين يعني الى 9 اطراف


و هنا غتلقاو طريقتي في تنظيف و تقطيع الدجاج بالصور و الشرح











و كنوجد الشرمولة التالية:





فإناء كندير الملح و 2 فصوص ثوم مهروس او مدقوق مع ملعقة صغيرة كامون و ملعقة صغيرة عطرية الدجاج
و نصف ملعقة صغيرة خرقوم و 1 مكعب البنة زعفران
و نصف ملعقة صغيرة سمن بلدي 15 حبة قاعقلا صاينة
مع 5 حبات بسيبيسة صاينة مع ملعقة وريقات نويويرة صاينين






كنضيف للكل قياس نصف كاس صغير ماء و كندق الكل باش تتجانس النكهات و تذوب فبعضها،






بعدها كندير فيها قطع الدجاج و نفركها بهاد الشرمولة مزيان هي و البصلة
( لو مكنتش مزروبة راه كنخليها تتخمر و تشرب النكهات مزيان باش كتزيد تبنان اللحم ديال الدجاج و لو كنت مزروبة فكنديرها الطيب نيشان)




بعد ميتشرب الدجاج الشرمولة كنستفو و نديرو يتشحر فالكوكوط مع البصلة




و بعدها كنضيف عليه قياس الماء فاش يطيب و نسد عليه حتى ينضج





بعد مكيطيب الدجاج كنعزل الدجاج عن المرقة






و كنخليه ينشف من المرقة











و كنوجد الخليط باش غنحمرو
و هو : نصف ملعقة سكر فانيلا
مع نصف ملعقة قرفة
مع 2 معالق زبدة



كنخلطهم مزيان




و كندهن بيهم كل قطع الدجاج من كل الجهات




و كندخلهم للفرن يتحمرو














و كنبدا فتحضير التخضيرة

هاد المرة خضرة بالبعويد طري و المشماش يابس و الڭرڭاع و اللوز محمر و مهرمش،
مملن تخضرو بالانناس طري او معلب او يابس او بالتفاح او البنان او الخوخ معلب او اي شي عندكم
انا مكانش عندي المعلب فقضيت بالطازج احسن

خذيت البعويد غسلتو و نقيتو مزيان



و قطعتو ترونشات و حيدت ليه الزريعة




و درتو فكسرونة





مع بودرة عصير الاناناس



و مع فنجان صغير ماء



و عملتو فوق عافية مهيلة




باش يتعسل و يتشرب نكهة الاناناس

و زينت المشماش اليابس بعد مغسلتو و نشفتو بالڭرڭاع









اما المرق للي بقى واقف و عاقد ديال الدجاج



فضفت ليه مقدار كاس صغير من اللوز المحمر و المهرمش
و نصف ملعقة سكر فانيلا و نصف ملعقة قرفة



و ملي تحمر لينا الدجاج
خذيتالطاجين فاش غنقدم درتو يسخن
و درت فيه المرق اولا
ثم ستفت فيه قطع الدجاج



و على كل قطعة حطيت دوارة من بعويد المعسل
و عليها قطعة من المشماش المزين بالڭرڭاع




و عاود رشيت على الكل لوز محمر و مهرمش












[IMG]http://img683.********************.us/img683/4841/96476659.gif[/IMG]

التقديم :




قدمتو بعد السلطة



(غنحطها ليكم فقسم السلطات )










مع خبيزات القمح و الشعير ديال الدار



مرفق بعصير البنان و التفاح بالحليب و اللوز





و فالاخير طبق ديسير مشكل






ملاحظة:




كلما تخمر الدجاج فالشرمولة كلما كان الذ
هذا ينطبق على كل اللحوم (دجاج ،لحم، سمك...)
فمن الافضل تحضرو اللحم
قبل بليلة فالشرمولة
و تخليوها تتشرب التوابل فالثلاجة مع البصل
عاد تنصبوها او طيبوها فاليوم الموالي

غتلاحظو انني نصبتو بلا زيت
لان الدجاج مكيحتاجش الزيت بزاف حيت جلدتو كلها دهنيات ،
و ايضا حيت فالشرمولة درت السمن
و زدت الزبدة فا
لتحمير و هو كافي،

للإشارة الزبدة كذوب و كتبقى فطاوة التحمير يعني الدجاج كيجي ناشف ماشي عامر بليدام

اما بالنسبة للمذاق الحلو فممكن تستغناو عليه لو كنتو غتقدموه لاشخاص عاملين رجيم او مرضي سكري

يعني بدل مديروه معسل و محمر ديروه غير محمر
و ايضا درجة الحلاوة انتم تختاروها انا كنعملو حلو غير شوية
لو بغيتوه يجي حلو و معسل اكثر زيدو السكر او السكر الفاني



ان شاء الله يعجبكم هاد الطبق
وصدقوني للي ذاقوعندكم غيبغي يعرف الطريقة


و كنديرهاحتى للحم و الحوت بنفس الطرقية غير كيتغيرو شوية العطرية
اضافة الى العطرية المعتادة (ملح ابزار خرقوم سكنجبير كامون قاعقلة بسيبيسة نويويرة )
للدجاج كنضيف عطرية الدجاج "مروزية"
و للحم كنضيف شوية المساخن
و للحوت كنضيف شوية من التوابل الاربعة

راه هادي من وصفاتي السرية هههههه
لكن حتى شي منخبيه عليكم الحبيبات

و نتمنى متبخلو عليا بدعواتكم الطيبة
لاني فأمس الحاجة ليها

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتن في رعاية الكريم

اختكن أمنــار

أم ريـَّــان

وعليكم السلام ورحمة الله وبركاته
لـ حفظ الموضوع والإستفاده منه إستخدمى هذا الرابط :
طاجين الدجاج معسل و مخضر بطريقتي و بالمراحل المصورة من مطبخي
http://forum.sedty.com/t325012.html



الصورة الرمزية طائرالوئام
09-18-2010, 06:12 مساءً
الله يعطيكي العافية...اختي العزيزة

وصفة رائعة....

باراك الله فيكي..

ينقل للقسم المناسب

الصورة الرمزية روح الشرقيه
09-18-2010, 10:29 مساءً
يعطيك العافيه
|░| يا حـي يا قيوم برحمتك أستغيث فأصلح لى شأنى كلـه و لا تكلنى إلى نفسى طرفة عين |░|

أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع


المواضيع المتشابهه
الموضوع المنتدى
البيتزا بطريقتي خاصة من مطبخي بالصور معجنات - سندويشات
طاجين الدجاج بالخضار أطباق منوعه
سمك بطريقتي وفي مطبخي الخاص الأطباق الرئيسية
طاجين الدجاج أطباق منوعه
الدجاج مخضر بالاناناس الأطباق الرئيسية

جميع الأوقات بتوقيت GMT +3. الوقت الآن 04:36 صباحاً.