الصورة الرمزية نوررالعيوون

خلاصة تجاربي

08-02-2015, 07:58 صباحاً

ماأدري من وين أبدأ ولاأدري شقول
وأعذروني على الفوضى اللي أتوقع أنها بتصير وأنا أكتب الموضوع

بس هو كلام بقلبي وأتمنى يطلع من قلبي ويوصل لقلوبكم

كلنا نعرف الركن الأساسي اللي عليه تبني حياتنابشكل عام وللأسف الكل أوالأغلب نسى هالركن عشان كذا حياتنا تنهار يوم عن يوم


((وَمَنْ أَعْرَضَ عَنْ ذِكْرِي فَإِنَّ لَهُ مَعِيشَةً ضَنكًا ))الآيه واضحه وصريحه ومايحتاج تفسير


نسينا نشكر الله ع نعم كثير في حياتنا
الحياة ومشاغلها نستنا ذكرالله
عشان كذا حياتنا طفش_ نكد_ ضيق


أنا ماراح أتفلسف عليكم بالكلام وأقولكم أنتوا وأنتوا ووو


أتوقع الكل عرف موضوعي
كله خلاصة تجاربي
مش فلانه سوت كذا وربي عوضها بكذا


أنا أقولكم أنا شسويت وربي بشنو عوضني


علاقتي بربي وكيف أنعكس ع حياتي الزوجيه


ولله الحمد أكتشف كل يوم أنو علاقتي اليوم بزوجي أحسن من أمس


ومتأكده 100% بإذن الله أن زوجي بكره بيكون لي أحسن من اليوم


ماأقولكم أنا ملتزمه وحافظه القرآن وماأشوف تلفزيون طبعا لا


بس ولله الحمد حفظت سورة البقره والكهف ومريم والقصص


بتقولين مشغوله وماعندي وقت


أنا أقولك حفظت السور من غير ماأمسك القرآن
بتقولي كيف؟

راح أقولكم من البدايه
أنا إذا أشتغلت في البيت كنت أشغل سورة البقره وأشتغل
وتكرر هالشي يوميا


مع مرور الأيام لاحظت أني جالسه أردد مع الشيخ الآيات ومع تكرار التشغيل حفظت سورة البقره ولله الحمد
وبعد كذا مع باقي السور


هذي أحسن طريقه للحفظ لأنك تسمعين من الشيخ يعني راح تحفظين السوره بشكل صحيح من فتحات وضمات وكسرات وشده وتجويد ويكون حفظك صحيح 100%


وربي يابنات تحسين براحه نفسيه وأن ربك قريب منك


حتى ولدي من كان ببطني كنت أشغل قرآن دايم ويوم ولدت ولدي خلاص تعود ماينام إلا ع القرآن


حتى زوجي مع أنه موملتزم ويسمع أغاني إلا أنه خلاص صار هو بنفسه يقول شغلي القرآن لولدك عشان ينام وننام


وربي يابنات حياة تملئها السكينه والإستقرار


الشي الثاني وربي يابنات أنو دايم أقول وأردد كلمة الحمدلله
وأستغفر دايم


لانمت قلت الحمدالله لاصحيت قلت الحمدلله
حتى لوزوجي جاب خبز للبيت أقوله يعطيك العافيه حبيبي ولاراح رفعت أيديني وقلت الحمدالله يارب


لاوداني السوق أو البحر أو لأهلي أو أي مكان قلت الحمدلله
لا طالعت لنفسي بمرايه
وأني أشوف وأسمع وأتكلم وأمشي قلت الحمدلله
لاطالعت بولدي قلت الحمدلله


لأنو هذي كلها نعم تبي شكر من رب العالمين

حتى مره زوجي جاني قال أنا تعبان ضايقتني الديون
قلتله حبيبي قول الحمدلله
ناكل ونشرب ومستورين
وماشحذنا من الشارع


غيرنا يتمنى ربع اللي عندنا
ربي عطانا نعم كثيره شقه حلوه
وولد وزوج طيب وزوجه طيبه
قول الحمدلله
فيقتنع ويقول أي والله الحمدلله


طبعا هذا كله أنعكس ع حياتي
بشكل عجيب
قال تعالى ((ولئن شكرتم لأزيدنكم))


((فقلت أستغفروا ربكم إنه كان غفارا * يرسل السماء عليكم مدرارا* ويمددكم بأموال وبنين ..))


وربي يابنات أني لوأقولكم زوجي كل يوم يصير أحسن من اللي قبله


أذكر جتنا فتره مضغوطين من الديون
مع كذا كنت أقول الحمدلله
وبدى ربي يفتحها علينا
وربي يابنات جاني مره وعطاني 1000 ريال وقال هذي لك أنتي تستاهلين
ورفعت يديني قلت الحمدلله يارب


وأتفاجأ كل يوم جايبلي شي مره شريحه فاتوره ومره فاجأني بسفره
لأنو ولله الحمد أشكر ربي ع كل شي لوزوجي جاب أي شي بسيط وتافه أقول الحمدلله


وأستغفر ع طول
والله جالس يفتحها علي


إذا كلمتني أمي وسألتني عن أحوالي أقولها الحمدلله يايمه أنامرتاحه أنا مبسوطه
(مع أنو مرينا بضائقات ماليه كثيره)
بس أهلي مايدرون كنت أقول دايم أني مرتاحه




رضيت بقضائي وقدري وحمدت رب العالمين عمري ماطالعت لفوق

وأذكر حتى زوجي بعد نفاسي ماجابلي هديه
ماسخطت ولاقلت ليه عارفه زوجي أنو عنده ديون


لوأقولكم أن يسويلي أشياء يمكن مافي رجال بالدنيا يسويها لزوجته


أنا مومجبره أقولكم وأشرحلكم عن حياتي الزوجيه وسعادتها


بس بوضح لكم كيف ربي يساعدني ويفتحها بوجهي يوم عن يوم
ورا ح يساعدكم بإذن الله إذا مانسيتوه


ذكرت الله في الرخاء يذكرني بالشده
حمدت الله ع كل شي وجالس يزيدني
وقاعدتي في الحياه (أقتنع بالقليل يأتيك الكثير
)


وربي يابنات اللحين دايم أحلم
أحلام بالليل أني ألبس حرير وغرفتي كلها ديابيج فخمه


أنا حاسه أنو ربي مع الأيام بيعطيني حياه أجمل وأجمل



يعني في هالموضوع ماأقولكم
عشان تصير حياتك حلوه
ألبسي وتكشخي وسوي ليلات رومانسيه أشعلي شموع


هذي كلها مكملات


قوي علاقتك مع رب العالمين ربي يساعدك

أحنا عقدنا الحياة الزوجيه بعقد كثيره ركضنا ورى اللبس الكشخه والمكياج الصارخ والكريمات ونتعلم الرقص وأساليب إغراء وغيرهاعشان الزوج يعجب فيني
همتنا سطحيات وتوافه الدنيا


ونسينا الأساس اللي هو توفيق رب العالمين وهدايته


لأن الزوج لو حب زوجته وربي لوتلبس خيشه ع قلبه أحلى لبس


ولوماحبها لوتلبسله لبس من باريس ولندن مايهمه


ومنو بيده يألف القلوب ويحببها ببعض هو رب العالمين


ولله الحمد بتوفيق من رب العالمين زوجي حبني لذاتي
لولبست وكشخت ولومالبست كله مايأثر


أنا أصف الحياة الزوجيه
غرفه أركانها ذكر الله
وجدرانها سته (القناعه_التفاؤل_الإبتسامه_الصبر _ الحكمه _الإيجابيه)


بختمها بموقف حلو صارلي سببه الإستغفار وحمد رب العالمين بس قولوا ماشاءالله


كنت مره جالسه أستغفر الساعه 4 الفجر وكان زوجي مداوم
شوي إلا جاني مسج
يوم فتحته إلا من زوجي
مسج غير عن كل مسج طلع من قلب زوجي ووصل لقلبي بسرعة البرق


طبعا مسج وسائط ماأقولكم صوره ومكتوب فيها كلام لا طبعا


وهو بالدوام جاب ورقه وقلم وكتب بخط يده كلمات حب وصورها بجواله وأرسله لي


يعني تخيلي يجيك مسج من زوجك بالجوال بخط يده شتحسين ؟
تحسين أنه فعلا يحبك وعبر فيها بخط يده



حبايبي أنا كل كلمه كتبتها ماأتفاخر فيها
لا أحتسبها لوجه الله


قد تكون كلمه من كلماتي تدخل السعاده في قلوبكم وحياتكم الزوجيه





تمنياتي لكن بحياااااة سعيد يملؤها ذكر الله ومحبته


اهداااااااااائي لكن.....م ن ق و ل للفائدة..........

الصورة الرمزية متفائله برحمة ربي
08-02-2015, 08:39 صباحاً
يعطيكي ربي العافيه و يجزيكي خيراً كلامك كثير يرفع من المعنويات و يقوي عزيمتنا
ربي يوفقك و يسعدك اكثر سلامي

( لَا تَدْرِي لَعَلَّ اللَّهَ يُحْدِثُ بَعْدَ ذَلِكَ أَمْرًا )
الصورة الرمزية نولي السهلي
08-02-2015, 08:43 صباحاً
موضوع جميل جدا
الله يزيدك سعاده وتوفيق
الصورة الرمزية سحايب ماطره
08-02-2015, 09:51 صباحاً
و الله ما قصرتي على ما وضعتيه هنا
الواحد يحمد ربه ع امور كثيره ما مجرد
ازمه ماديه يمر فيها ، يصيبه فشل و احباط
و ينسى باقي النعم ...






الصورة الرمزية LITCHI
08-02-2015, 05:16 مساءً
-
يَ الغآليـه يعطيكِ العآفيـه ربي ، بِجد كلآمكِ إيجآبـي وَ فَتـح عِيوننـآ على أشيآء كَثيـره ..
مَشكوره وَ كمآ قِيـل بآلحَمد تَدوم النِعم ، فآلحَمدلله حتى يبلغ الحَمد مُنتهآه ..


أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع


المواضيع المتشابهه
الموضوع المنتدى
هذه خلاصة لتعطير المنطقه الحساسه الحياة الزوجية
خلاصت/ي لعب00ادخلي هنا000 للمواضيع الفكاهيه
لوشن للوجه من خلاصة تجاربى صالون العنايه بالبشره
خلاصة قصة نور المسلسل المدبلج القصة القصيرة

جميع الأوقات بتوقيت GMT +3. الوقت الآن 06:34 مساءً.